Quade Cooper maak boksdebuut

2012-11-26 10:59

Brisbane – Die Wallaby-losskakel Quade Cooper het Maandag onthul dat hy vroeg aanstaande jaar sy debuut in die bokskryt gaan maak.

Cooper se rugbytoekoms is onseker ná die aankondiging vroeër dat hy slegs 'n aansporingskontrak, wat gewoonlik aan jongelinge toegeken word, deur die Australiese rugbyunie (ARU) aangebied is.

Die Reds-speler het Maandag gesê dat hy reeds 'n geruime tyd boks as deel van 'n rehabilitasie-program vir sy knie-operasie en dat hy op 8 Februarie aan sy eerste geveg gaan deelneem.

"Op die oomblik is ek steeds deur die ARU tot die einde van Desember gekontrakteer," het die 24-jarige by die mediakonferensie in Brisbane gesê.

"Ek het nie regtig 'n opsie op die oomblik om met rugby voort te gaan nie, so vir nou konsentreer ek daarop om my liggaam reg te kry."

"Ek oefen steeds saam met die Reds omdat ek steeds 'n kontrak met die span het. Al wat ek nou doen is om my lyf gereed te kry vir die boksgeveg."

Cooper is in Oktober vanjaar swaar beboet en vir drie wedstryde geskors nadat hy die Australiese span gekritiseer het.

Die uitgesproke Wallaby moes A$60 000 (sowat R538 000) opdok omdat hy rugby in oneer gebring het deur die Wallabies en hul afrigter, Robbie Deans, te kritiseer.

Lees verder.

Vir die jongste sportnuus volg Nuus24Sport op Twitter.

– Sport24