Quade Cooper hang sy Wallaby-trui op

2012-11-19 12:26

Sydney – Die omstrede Wallaby-losskakel Quade Cooper het 'n nuwe kontrak van die Australiese rugbyunie (ARU) verwerp en sal straks nou sy tasse vir Frankryk pak of 'n skuif na rugbyliga maak, het die plaaslike media Maandag berig.

Dié aankondiging volg nadat Cooper slegs 'n aansporingskontrak, wat gewoonlik aan jongelinge in die span toegeken word, deur die ARU aangebied is.

Cooper is in Oktober vanjaar swaar beboet en vir drie wedstryde geskors nadat hy die Australiese span gekritiseer het.

Die uitgesproke Wallaby moes A$60 000 (sowat R538 000) opdok omdat hy rugby in oneer gebring het deur die Wallabies en hul afrigter, Robbie Deans, te kritiseer.

Cooper het vroeër aangedui dat hy vir nog drie seisoene by die Queensland Reds wil aanbly, maar die ARU se deel van die kontrak moes toe nog voltooi word.

Vir die jongste sportnuus volg Nuus24Sport op Twitter.

– Sport24