Quade Cooper beboet, geskors

2012-10-31 12:06

Sydney – Die uitgesproke Wallaby-losskakel Quade Cooper is Woensdag swaar beboet en vir drie wedstryde geskors nadat hy 'n tugverhoor van die Australiese rugbyunie (ARU) bygewoon het.

Cooper is met A$60 000 (sowat R538 000) beboet en gekors omdat hy rugby in oneer gebring het deur die Wallabies en hul hoofafrigter, Robbie Deans, te kritiseer.

Daar is besluit dat A$20 000 (sowat R179 000) van die boete sowel as die skorsing opgeskort sal word op voorwaarde dat hy hom vir die volgende twee jaar nie aan enige wangedrag sal skuldig maak nie.

Die ster-loskakel het in September die nuus gehaal toe hy negatiewe kommentaar gelewer het oor sy span en die manier waarop dit hom glo negatief beïnvloed het.

"Dit was 'n regverdige verhoor en ek is tevrede met die uitkoms," het Cooper Woensdag aan joernaliste gesê.

"Voortaan kyk ek net na die toekoms – hopelik het ek 'n groot jaar met die Wallabies."

Vir die jongste sportnuus volg Nuus24Sport op Twitter.

– Sport24