Potgieter praat oor dáái skop
2010-09-14 09:43
Johannesburg - Ná meer as ’n halfdosyn seisoene in Absa se Curriebeker-rugbyreeks het die Blou Bulle-losskakel, Jacques-Louis Potgieter, reeds al die emosies beleef wat met die land se spog-provinsiale reeks gepaardgaan.
Hy was egter lanklaas só geskok soos Saterdag in Bloemfontein toe die grensregters en later ook die televisieskeidsregter beslis het ’n strafskop deur hom is nie oor nie.
Daar is geen twyfel by Potgieter dat die bal wel aan die binnekant van die regterpaal deur is nie.
“Dit was skokkend. Ek weet die bal was deur die pale en weet nie hóé dit anders vertolk kon word nie,” het Potgieter gister gesê.
Dit was egter nie die rede waarom die Blou Bulle vasgeval het teen ’n span vir wie Potgieter nog verlede seisoen uitgedraf het nie, sê hy.
“Nee, daardie eerste drie in die openingsminuut het ons gekelder. Ons was aan die slaap en klaar.
“Dit sou nogtans gehelp het as die skop wel erken is, want daar is ’n groot verskil in ’n taai wedstryd soos dié om met drie punte agter te loop en nie met ses nie. Jy het soveel meer opsies as jy strafskoppe kry en hoef nie die wedstryd so te ‘jaag’ nie.”
Die Blou Bulle se afrigter, Frans Ludeke, het gister nog op ’n antwoord van die skeidsregterbaas, André Watson, gewag oor die meriete van dié skop-beslissing.
Hy het net soos Potgieter beaam dat dit nie as ’n rede vir die nederlaag voorgehou kan word nie.
“Ons was nie klinies genoeg nie. Ons het kanse gehad, maar hulle nie gebruik nie. Dit het ons gekelder.”
Dit was byna déjà-vu vir die Blou Bulle wat daardie skop betref, want in 2007 is ’n skop van Derick Hougaard in die halfeindstryd van die Curriebeker-reeks tussen dié spanne ook as mis aangedui terwyl dit in werklikheid oor was.
Die grensregters destyds, Louis Mzomba en Deon van Blommenstein, is later van die paneel verwyder.
Ludeke meen daar is steeds kalmte in die Blou Bulle se kamp, al is die span maar in die vyfde plek op die puntelys, met slegs vier wedstryde oor.
“Ons moet bewus wees van wat op die puntelys aangaan, maar gee nie uitermate aandag daaraan nie.
“Ons fokus bly op die week wat voorlê en in dié geval op die Leeus wat wag. Vandeesweek se voorbereidings sal fokus op die manier hoe ons meen hulle geklop kan word.”
Ludeke wou nie hieroor uitwei nie, maar dit gaan nie ’n kernfisikus verg om te weet dat die Leeus se baldraers teruggeduik moet word voordat hulle die bal versprei nie.
Dit is die beste manier om die besoekers se benadering van bal in die hand in die kiem te smoor.
“Ja, ons sal die kontaksituasie moet beheer,” het Ludeke erken.
Die breier hoop om vandag goeie nuus oor Deon Stegmann te kry.
Dié baljagter se dyspier herstel goed en sy terugkeer tot die Bulle se span het ’n saak van noodsaaklikheid geword.
- Die Blou Bulle se oorblywende wedstryde ná Saterdag se stryd teen die Leeus op Loftus Versfeld is 25 September teen die Luiperds in Potchefstroom, 2 Oktober teen die Westelike Provinsie op Loftus Versfeld en 9 Oktober teen Griekwas in Kimberley.
Bly op hoogte van al die jongste sportnuus deur Nuus24Sport op Twitter te volg.
- Sport24