Plumtree se span uitgedun
2010-09-07 08:35
Durban – Beserings en die lui van huweliksklokkies gaan die Haaie aansienlik uitdun vir Vrydagaand se Curriebeker-rugbywedstryd teen die Pumas in Witbank.
En dan sal daar ook nog gesien moet word of hul afrigter, John Plumtree, sy woord gestand gaan doen en die snoeiskêr gaan inlê omdat sy spelers oorgerus was in Saterdag se nederlaag teen die Blou Bulle.
Die enkelbesering wat die agtsteman, Keegan Daniel, opgedoen het teen die Bulle in Pretoria, gaan hom uit die stryd teen die Pumas hou.
Gelukkig kan die Springbok Ryan Kankowski weer sy plek in die nr. 8-trui inneem en sal dit dus nie juis ontwrigtend wees op die lostrio nie.
Die heelagter Louis Ludik gaan moontlik ook nie saamry Witbank toe nie.
’n Bobeenbesering, wat hy net voor die stryd teen die Bulle opgedoen en hom uit dié wedstryd gehou het, kan hom weer kniehalter.
Die slot Ross Skeate, wat die afgelope twee weke misgeloop het, sal vandeesweek ’n liesoperasie ondergaan. Dit sal hom ’n verdere vier tot ses weke langs die kantlyn hou.
Hoewel die stut Jannie du Plessis beskikbaar is om oorweeg te word teen die Pumas, hang ’n vraagteken oor sy deelname. Hy het in die verloortoets in Bloemfontein ’n knie beseer.
Die Haaie se ander Springbok-stut, Beast Mtawarira, kry hierdie naweek die strop om die nek en sal nie teen die Pumas speel nie.
Voer die Springbok-bestuur hul besluit uit om die gekontrakteerde Bokke te onttrek, kan Bismarck du Plessis ook nie deel wees van die span wat die Pumas moet probeer tem nie.
Die Bok-senter Adrian Jacobs is nadat hy lank uit aksie was met ’n skouerbesering weer reg om te speel.
Daar sal besluit moet word of hy as een van die gekontrakteerde Bokke nou eerder vir die Haaie moet speel, of deel van ’n kondisioneringsplan gaan wees.
Die slot Gerhard Mostert se fiksheid moet eers op peil gebring word voordat hy oorweeg sal word.
Bly op hoogte van al die jongste sportnuus deur Nuus24Sport op Twitter te volg
– Sport24