Plumtree ‘verpletter’ oor Deysel-besering
2010-08-11 13:00
Johannesburg – Die Haaie se strewe om vanjaar die Curriebeker te verower, wat hulle verlede jaar aan die Blou Bulle afgestaan het, het ’n kwaai knou gekry met die nuus dat die ysterman Jean Deysel se rugbyseisoen vanjaar iets van die verlede is.
Dié stewige flank het Saterdag kruisligamente in sy een knie geskeur teen die Leeus in Durban en sal minstens ses maande uit aksie wees.
Die Haaie se afrigter, John Plumtree, maak geen geheim daarvan dat dit vir hom ’n verpletterende slag is nie.
Hy was baie gretig om die kombinasie van Willem Alberts en Deysel as deel van sy lostrio in te span.
“Saam is hulle skrikwekkend en geen span in die land sal teen hulle wou speel nie.
“Dié twee maak ’n groot deel van my planne uit om wedstryde voorlangs te oorheers.
“Dit is ’n groot jammerte dat hulle nou nie meer saam verwoesting sal kan saai nie,” het ’n teleurgestelde Plumtree gesê.
Die Haaie is darem gelukkig dat hulle genoeg ander losvoorspelers van gehalte het, maar nie een is ’n stoomroller soos Deysel nie.
Met Ryan Kankowski wat die volgende paar weke weer deel van die Springbok-groep is, sal Alberts, Jacques Botes en Keegan Daniel die lostrio vorm.
Menige spanne sal nog wat wil gee om dié drietal te kan inspan.
Met die Haaie wat ook die regtervleuel JP Pietersen aan die Bokke afstaan, sal nog ’n Bok, Odwa Ndungane, darem weer terugverwelkom word.
Hy sal vandeesweek ’n fiksheidstoets moet slaag om deel van die groep te wees wat Vrydagaand in die Royal Bafokeng-stadion net buite Rustenburg teen die Luiperds te staan kom.
Die Luiperds sweet self om hul vlymskerp-skrumskakel Michael Bondesio betyds gereed te kry, berig Pieter Jordaan.
Bly op hoogte van al die jongste sportnuus deur Nuus24Sport op Twitter te volg