Plumtree daag sy Haaie uit
2011-09-29 10:01
Johannesburg. – John Plumtree, afrigter van die Haaie se rugbyspan, het sy voorspelers uitgedaag om die aanslag van hul teenstanders in die Curriebeker-reeks die hoof te bied.
“Die spanne teen wie ons speel, besef ons het ’n uitgedunde agttal en daarom is ons in hul visiere,” het Plumtree gesê.
“Ek het dit duidelik aan my spelers gestel dat ons voorlangs staande moet bly.
“Van die groter pakke maak dit moeilik vir ons, veral uit die oogpunt van verdediging, want hul groot baldraers gaan deur die middel (van ons voorspelers se verdediging) en dit is moeilik om hulle te stuit,” sê hy.
Plumtree sê sy span speel nog nie die rugby wat van hom verwag word nie en hy het die spelers uitgedaag om die verlangde peil te bereik.
Nadat daar van die begin van die jaar af gepeins is oor die beste senterkombinasie, lyk dit asof Plumtree eindelik besluit het om die Springbok Adrian Jacobs ’n kans te gee.
Hy het dikwels ’n beduidende impak gemaak wanneer hy as plaasvervanger gebruik is, maar Plumtree het hom nog nie ’n kans gegee om vanuit die staanspoor sy stempel af te druk nie. Jacobs behoort in die beginspan te wees wanneer die breier Donderdag sy span aankondig vir Saterdag se stryd teen die WP.
Vir die jongste sportnuus volg Nuus24Sport op Twitter.
– Sport24