Plumtree: 'Draai horlosie terug'
2011-10-24 09:53
Durban – Die eerste prys vir die Haaie sou ’n eindstryd hier by die huis teen die Westelike Provinsie gewees het, maar die dobbelstene het geval en nou moet hulle die beste van die saak maak.
John Plumtree wil hê sy rugbyspan moet die horlosie terugdraai na 1996, toe André Joubert daardie dag sy driekuns aan drieë gedruk en die Haaie die Curriebeker op die destydse Ellispark verower het.
“Ons het dit al gedoen en kan dit weer regkry,” het Plumtree gesê nadat die Leeus die WP Saterdag geklop het en sy span nou na die Goudstad moet reis om die Goue Beker te verdedig.
Die sukkelende manier waarop sy span die Cheetahs Saterdagmiddag hier op Kingspark met 20-13 geklop het, glo Plumtree kan nog ’n bedekte seën wees.
“Dit het ons geleer om as ’n span saam te werk. Daar is in die eerste helfte heeltemal té individualisties gespeel en eers toe ons as ’n eenheid begin funksioneer, het dinge vir ons begin uitwerk,” het hy gesê oor die agterstand van 3-13 wat in die tweede helfte uitgewis is.
Op die vraag wat hy met rustyd aan sy spelers gesê het, het Plumtree gegrynslag en gesê: “Ek beter dit maar liewer nie herhaal nie.”
Die Haaie beplan glo om vandeesweek vroeër na Johannesburg te gaan vir hul voorbereiding vir die eindstryd. Hulle sal glo in die Magaliesburg-omgewing slyp.
Die oorwinning bietjie meer as ’n week gelede op Kingspark met bykans 50 punte oor die Leeus gaan net mooi niks tel in die eindstryd nie, glo Plumtree.
Die eindstryd beskou hy as ’n heeltemal ander situasie en een wat uiteraard veel meer gelykop sal wees.
Daar is wel diegene wat sal glo die sielkundige letsels van die groot sege wat die Haaie behaal het, sal nog sigbaar wees by die Leeus, maar baie van hul sterre het daardie dag gerus en was op die plaasvervangersbank.
Dan is daar natuurlik ook die teorie dat die maklike sege wat die Haaie behaal het, dalk net ’n slaggat kan wees waarin hulle kan trap en dat oorgerustheid nou een van hul vernaamste struikelblokke kan wees.
Die besering (lamboud) wat die Fransman Frederic Michalak (losskakel) in die eerste helfte opgedoen het toe hy en sy Haaie-spanmaat Stefan Terblanche teen mekaar vasgehardloop het, blyk nie té ernstig te wees nie en Plumtree glo hy sal teen Donderdag ’n volle fikse groep hê om uit te kies.
Vir die jongste sportnuus volg Nuus24Sport op Twitter.
– Sport24