Pierre Spies help veldbrand blus
2011-12-22 10:01
Port Elizabeth. – Met sy spoed en spierkrag speel Pierre Spies, nuutgekose kaptein van die Bulls, gewoonlik die rugbyveld aan die brand.
Maar Dinsdag het hy sy lyf brandweerman gehou en gehelp om ’n veldbrand in Port Alfred in die Oos-Kaap te blus.
Spies en sy vrou, Juanné, kuier in Port Alfred by Walmar Slabbert, sy vriend.
Spies het gesê hy, sy vrou en Slabbert was Dinsdag omstreeks 16:00 van die strand af op pad toe hulle die vlamme gewaar het.
“Die brand was naby aan my vriend se ouerhuis. Inwoners in die omgewing het baie bekommerd gelyk oor die sterk wind en baie rook.”
Spies en Slabbert het saam met ’n buurvrou en twee jong skoolseuns van die omgewing begin om brand te slaan.
“Ek was veral beïndruk met die twee jong manne,” het Spies Dinsdag aan Beeld gesê.
“Hulle het gesê hul vriende se huis is ook in die omgewing; dis waarom hulle ook kom help het.”
Die brandweer het later by hulle aangesluit.
Om die brandweermanne te help het Spies later sommer ook agter die stuur van die brandweerwa ingeskuif.
“Ons was ’n goeie twee uur besig. Ons het selfs met die brandweerwa vasgesit!” het hy gesê.
Die brand is uiteindelik omstreeks 18:00 geblus.
Khilukile Mbolekwa, mediawoordvoerder van die brandweer in Port Alfred, het gesê die brandweerpersoneel het onmiddellik op die oproep gereageer en was vinnig op die toneel.
Die oorsaak van die brand is nog onbekend.
Volg Nuus24Sport op Twitter.
- Beeld