Parisse geskors ná hy blaser vloek

2013-02-21 10:32

Parys – Italië se kaptein Sergio Parisse sal die res van die Sesnasies-toernooi misloop nadat hy vir 30 dae geskors is omdat hy 'n skeidsregter gevloek het.

Dié Stade Francais-agsteman het rooi gesien in sy klub se Top14-wedstryd verlede Saterdag teen Bordeaux en is tot 18 Maart deur 'n tugkomitee geskors.

Parisse sal gevolglik Italië se Sesnasies-wedstryd Saterdag teen Wallis en die kragmeting met Ierland op 16 Maart misloop.

Hy is in die 36ste minuut van die wedstryd teen Bordeaux afgestuur nadat hy die blaser gevloek het, maar Parisse ontken die aantyging.

Italië het vir 'n groot opskudding gesorg toe hulle Frankryk met 23-18 in die openingswedstryd van die Sesnasies-toernooi geklop het.

Vir die jongste sportnuus volg Nuus24Sport op Twitter.

- AFP