Oud-rugbybaas Louis Luyt sterf

2013-02-01 13:14

Dr. Louis Luyt, oud-rugbybaas en politikus is Vrydag in die ouderdom van 80 jaar oorlede. (AFP)

Johannesburg –  Dr. Louis Luyt, voormalige president van die Suid-Afrikaanse rugbyunie (Saru) en politikus, is Vrydagoggend in 'n hospitaal in Durban in die ouderdom van 80 jaar oorlede, het Eyewitness News bevestig.

Luyt het die koerant The Citizen in 1976 gestig en was ook die destydse voorsitter van die Transvaalse rugbyunie.

Hy was president van die Suid-Afrikaanse rugbyunie toe die Springbokke in 1995 die Wêreldbekertoernooi op eie bodem gewen het.

Hy het in 1998 as die president van dié unie bedank en tot die politiek toegetree. Luyt was van 1999 af 'n parlementslid as leier van die Federale Alliansie.

Kevin de Klerk, president van die Goue Leeus rugbyunie (GLRU), het in 'n telefoniese gesprek met RSG gesê sy dood is 'n geweldige verlies vir die rugbygemeenskap en bygevoeg dat dr. Luyt erg ontsteld was oor die Lions se weglating uit vanjaar se Super-reeks.

"Dok Luyt wou met alle mag sy gewig agter die Lions ingooi toe hy hoor dat die span nie in vanjaar se Super-reeks gaan speel nie," het de Klerk gesê.

Meer besonderhede oor die oorsaak van sy dood is nie in dié stadium bekend nie, maar volgens Volksblad het hy vir jare met hartprobleme gesukkel.

Volg Nuus24 op Twitter.

– Sport24