Oud-kaptein 'hartseer' oor Jan Ellis
2013-02-09 10:15
Pretoria – Dr. Dawie de Villiers, onder wie se kapteinskap Jan Ellis die meeste van sy toetse gespeel het, het gesê dit is “hartseer om ’n ou Springbokmaat te verloor”.
Ellis (71), die legendariese oud-Springbokflank wat lank saam met Frik du Preez die rekord vir die meeste toetse vir die Springbokke gehou het, het Vrydag ná 'n lang stryd teen beenkanker gesterf. Hy is in ’n hospies dood, berig Beeld.
“Jan was ’n uitsonderlike en begaafde rugbyspeler. Hy was groot én sterk en vinniger as baie agterspelers,” het De Villiers onthou.
“Sy swenk was bedrieglik en hy kon spelers goed afstamp met die bal in een van sy groot hande.”
De Villiers het gesê Ellis was ’n “stil en teruggetrokke mens wat nie voor op die wa was nie”.
Ellis se dogter, Petro Olivier, het gesê haar pa gesondheid was die afgelope ruk nie so goed nie.
"My pa het die laaste ruk baie gely. Hy het so 18 maande lank kanker gehad.”
Ellis is in 2000 in ’n rooftog in Pretoria gewond en het sedertdien met sy gesondheid gesukkel.
Hy is in Brakpan gebore, maar het naby Gobabis in Namibië groot geword. Hy het tussen 1965 en 1976 in 38 toetse gespeel en 74 keer (gewone toerwedstryde ingesluit) die groen-en-goud oor die kop getrek.
Dié rateltaai-flank was bekend om sy fiksheid en het net een van die 39 toetse misgeloop wat tussen sy eerste en laaste toets gespeel is.
Ellis het sewe toetsdrieë gedruk en nóg 25 in toerwedstryde.
Ellis, wat sy loopbaan as kaptein van Transvaal afgesluit en die laaste 30 jaar op Rayton naby Pretoria gewoon het, het in 1965 sy toetsbuiging in Wellington, Nieu-Seeland, teen die All Blacks gemaak.
Oregan Hoskins, president van die Suid-Afrikaanse Rugbyunie, het in ’n verklaring gesê Ellis was een van die “beste Springbok-losvoorspelers van alle tye”.
“Hy was ’n ‘instelling’ in die Springbokspan en sal veral met deernis deur die ouer geslag rugby-ondersteuners onthou word.”
Ellis word oorleef deur sy vrou, Heila, twee kinders, Petro Olivier en Jan Ellis jr., en vyf kleinkinders.
– Volg Nuus24Sport op Twitter
