Oud-Gimmie maak opgang in Engeland
2011-03-09 13:31
Kaapstad - 'n Oud-leerling van Paarl Gymnasium, Stefan Liebenberg, is vir Engeland Counties in 'n voorwedstryd van die Sesnasies-kragmeting tussen Ierland en Engeland in op 18 Maart in Dublin, gekies.
Liebenberg, wat in 2002 in die Paarl gematrikuleer het, het vir sy skool se eerste span gespeel en in dieselfde jaar die Westelike Provinsie by die Cravenweek verteenwoordig.
Hy het na skool vir die Vrystaatse universiteitspan die Shimlas uitgedraf. En is ook vir Vrystaat se o.19- en o.21-span gekies.
In 2006 het die jongeling sy rugbyloopbaan in Engeland gaan voortsit en by Cambridge se rugbyklub aangesluit.
Tans speel hy vir die Old Albanians. Tot dusver was een van die hoogtepunte in Liebenberg se rugbyloopbaan toe hy onlangs vir die Saracens Storm-span teen London Wasps gekies is.
Saracens Storm is die Saracens klub se B-span. “Dit was vir my 'n ongelooflike ervaring om vir Saracens Storm te kon speel," het Liebenberg oor sy insluiting gesê.
Hy sal in Dublin op skrumskakel vir Engeland Counties teen 'n span van Ierland uitdraf.
Engeland Counties se span: Voorspelers: Dave Allen, Sam Beaumont, Alex Clarke, Matt Hall, Robbie Hurrell, James Kellard, Aaron Liffchak, Dan Lloyd-Jones, Alex MacKenzie, James Ngan, Steve Pape, Tom Standfield.
Agterspelers: James Brown, Gareth Collins, Peter Hodgkinson, David Howells, Tom Jarvis, Stefan Liebenberg, Ben Spencer, James Stephenson, Mike Waywell, Tom Wheatcroft.
Bly op hoogte van al die jongste sportnuus deur Nuus24Sport op Twitter te volg.
