Oud-Bokke en -Engeland pak mekaar
2010-11-23 14:08
Londen - 'n Oud-Springbokspan gaan voormalige Engeland spelers op die vooraand van Suid-Afrika se toetswedstryd teen die Rose in Londen pak.
Die Engeland-legendes sal deur die oud-kaptein en voormalige Britse en Ierse Leeu Martin Corry gelei word. Jason Leonard, die speler wat Engeland nog die meeste op toetsvlak verteenwoordig het, is ook in die span.
Ander name sluit in Jason Robinson, Paul Grayson, Mark Regan en Josh Lewsey.
Suid-Afrika se legende span sal op die veld gelei word deur John Allan, die voormalige Bok-haker. Die Springbok-legendes se afrigter is oud-Bok en Sharks-breier Ian McIntosh.
Ander spelers sluit in AJ Venter, Joost van der Westhuizen, Braam van Straaten, Brendan Venter, Robbie Kempson, Cobus Visagie, Marius Hurter, Pieter Muller en Breyton Paulse.
Kaartjies na die feestelikhede, wat om 12:00 afskop, kos slegs £10 (sowat R110).
Vir £10 kry ondersteuners ook 'n boereworsrolletjie én 'n Windhoek Lager.
Meer inligting is beskikbaar by www.springboksupporter.co.uk
Bly op hoogte van al die jongste sportnuus deur Nuus24Sport op Twitter te volg.
- Sport24