Oud-Bok sterf aan hartaanval
2011-02-13 21:20
Oos-Londen - Die voormalige Springbok-skrumskakel Dirk de Vos, wat in die 1960’s en 1970’s agter die oond diens gedoen het, is Saterdag in Potchefstroom dood aan ‘n hartaanval in die ouderdom van 69.
De Vos het vir die Westelike Provinsie en die Wes-Transvaal uitgedraf in Curriebeker-wedstryde.
Hy was nie altyd gewild by die kritici nie en is soms as ‘n selfsugtige speler bestempel, maar op sy dag kon hy ‘n wedstrydwenner wees met sy dartellopies en taktiese skoppe.
Die voormalige Springbok-kaptein Hannes Marais was hartseer om van De Vos se dood te hoor.
“Hy was ‘n goeie vriend van my, maar ek het geweet dit het nie onlangs met hom goed gegaan nie, aangesien hy nie meer aangesluit het by reünies nie,” het Marais Sondag vanuit sy huis in Port Elizabeth gesê.
“Dirkie kon briljante dinge doen, maar het dikwels sy eie spel gespeel.”
De Vos het Suid-Afrika in drie toetse verteenwoordig. Hy het saam met die Springbokke in 1965 na Ierland en Skotland getoer, in 1969 na die Verenigde Koninkryk en in 1971 na Australië.
- Vir die jongste sportnuus, volg Nuus24Sport op Twitter
- SAPA