Oud-Bok se seun in Hane-visier
2009-09-30 11:09
Stephen Nell
Kaapstad - Frankryk is sy “tweede span” en daarom sal hy nie omgee indien sy seun, Antonie, aanstaande jaar vir Les Bleus toetsrugby speel nie.
Só het die voormalige Springbok-kaptein, Wynand Claassen, gister gereageer op berigte uit die Noordelike Halfrond dat sy spruit in die Franse breier, Marc Lievremont, se visier is.
“Ek het gehoor hy word hoog aangeskryf, maar hy moet net aanhou om sy beste te lewer,” het Claassen sr. gister gesê oor sy seun wat vir Brive speel.
“Frankryk (Les Bleus) was altyd my tweede span. Ek het self daar vir die klubspan Marmande gespeel.”
Lievremont, wat in die verlede sy neus vir oorsese spelers opgetrek het, het luidens ’n berig deurAFPgesê dat Antonie Claassen die enigste oorsese speler is in wie hy werklik belangstel.
“Ek kyk al die Top14-wedstryde. Die enigste oorsese speler waarvan ek hou, is Antonie Claassen. Hy beskik oor die eienskappe wat ek in ’n losvoorspeler soek,” het Lievremont gesê.
Claassen (24) het gister uit Frankryk aan Sport24 gesê hy is in Oktober 2007 “blindelings” Frankryk toe.
Hy sal ingevolge die Internasionale Rugbyraad se reëls eers Oktober aanstaande jaar vir die Hane beskikbaar wees.
Hy het by Marmande begin, maar is daarna Brive toe.
“Olivier Magne (’n voormalige losvoorspeler van Frankryk) is beseer en is as afrigter aangestel, wat beteken het ek kon sy plek in die groep neem.”
Claassen het aanvanklik besluit om oorsee te gaan speel toe sy loopbaan by die Blou Bulle nie vinnig genoeg gevorder het nie.
“Ek het nooit werklik ’n impak daar gemaak nie,” het hy gesê.
By Brive is dit allermins die geval en hy vind dit vleiend dat Lievremont sy naam in die openbaar noem.
“Dis ’n groot eer, maar hopelik praat hy volgende jaar hierdie tyd nog steeds oor my, want ek is eers dán in Oktober beskikbaar vir Frankryk,” het Claassen gesê.
“Ons speel hierdie seisoen in die Heineken-beker.
“As ek op daardie vlak goed kan vertoon, sal dit baie vir my selfvertroue beteken.
“Jy speel teen die beste in Europa en dit sal ’n deeglike toets wees.”
Claassen geniet dit ewe veel op flank as agtsteman. Hy is ’n sterk baldraer en het ’n goeie werketiek.
“Ek gee altyd 100%. Die Franse hou van spelers wat hard werk,” sê hy.
“Die standaard in die Top14 is goed.
“Enige span kan die ander in ’n gegewe naweek klop.”
- Die Burger