Oud-Bok red meisie se lewe
2010-01-14 08:02
Elsje Blair
Londen - Die voormalige Springbok-senter en oud-Cheetah Brendan Venter, ’n mediese dokter, het ’n Suid-Afrikaanse kind se lewe in Londen gered.
Venter, oud-Springbok wat deesdae direkteur van rugby by die Saracens-rugbyklub in Engeland is, het per SMS aan Volksblad gesê: “Met die Vader se genade is die dogtertjie ok. Ek het ook groot geskrik.”
Hy sê Marelie Raath (3) se ouers, Tinus en Ilze Raath, het laatmiddag by hulle kom kuier toe Marelie aan ’n lekker verstik en byna versmoor het.
Brendan sê: “Ons het aan die kombuistafel gesit. Die volgende oomblik het sy (Marelie) na haar ma toe geloop. Haar gesiggie was potblou, sy was doodstil en haar ogies was so groot soos pierings.
“Gewoonlik as ’n kleintjie verstik, hoes en proes hulle en dan los mens hulle. Hulle kom vanself reg, maar ek het geskrik toe ek haar sien. Ek het haar opgetel en die Heimlich-beweging op haar uitgevoer. Dit het nie gehelp nie.
“Ek het dit weer gedoen, maar sy het nie ’n geluid gemaak nie. Die derde keer het sy, met die Here se genade, begin hoes en huil,” het hy gesê.
Venter het hierna toetse op klein Marelie gedoen om seker te maak sy is buite gevaar en dat die lekker nie in haar longe beland het nie.
“Sy was piekfyn. Dié voorval het my opnuut laat besef hoe vinnig ’n ongeluk kan gebeur. Ons het soveel om voor dankbaar te wees. Elke nuwe dag is kosbaar en moet geleef word asof dit jou laaste is.”
Mev. Ilze Raath, die dogtertjie se ma, sê: “Ons is baie dankbaar vir Brendan se hulp. Ek het nie besef hoe ernstig die situasie nie was totdat ek Brendan later die aand gebel het om dankie te sê. Hy het net gesê dit was ’n close call.
“Ons kinders speel gereeld saam en ons het huisvriende geword. Dit is net met die Here se genade dat Brendan op dié tydstip by die huis was om te help,” het sy per telefoon uit Londen gesê.
“Marelie het saam met Brendan se dogter, Esna (13), op die rusbank gesit en lekkergoed eet toe sy verstik het.
“Brendan was só kalm en professioneel. Ek is baie dankbaar dat hy my kind se lewe gered het,” het sy gesê.
Raath en haar man, Tinus, ’n rekenmeester, is oorspronklik van Durban.
Hulle het in 1997 na Londen verhuis.
Die Venters en Raaths bly ’n klipgooi van mekaar in St. Alban’s, ’n woonbuurt net buite Londen.
- Volksblad