Os lees Bakkies se kop en sê hy kan regkom
2010-07-15 06:48
Wellington (Nieu-Seeland). – Hy glo Bakkies Botha het by ’n kruispad in sy rugbyloopbaan gekom. Geen rede bestaan egter waarom die Bok-slot nie weer die Groen en Goud kan aantrek nie, maar dan sal Botha sy probleem op sielkundige vlak moet uitpluis.
Só glo die Bok-legende Os du Randt, wat in Auckland as deel van die Springbok-afrigtingspan was toe Botha die All Blacks-skrumskakel, Jimmy Cowan, met die kop bygekom het.
“Ek dink Bakkies is regtig jammer en weet hy het dié keer te ver gegaan,” sê Du Randt.
“Hy sal hard moet gaan werk aan die sielkundige sy van sy spel en probeer om daardie instinktiewe oomblikke uit sy kop en sy spel te weer. Hy sal sy brein moet gaan programmeer om dit nie weer te doen nie,” het Du Randt gesê.
Hy glo Botha het waarskynlik reeds met die proses begin.
“Ek kon sien hy is regtig jammer. In die verlede was daar altyd ’n gevoel dat hy dalk te na gekom is, of dat dit 50-50-beslissings was. Daar is ook gesê hy word uitgesonder. Hy besef dié keer was hy die idoot en niemand anders nie.”
Volgens Du Randt het hy vir Botha met rustyd van die toets gesê ‘ek is die hel in vir jou’, maar ná die tyd die speler se opregte spyt ervaar.
“Daar is geen manier dat Bakkies voor die tyd beplan om ’n ander speler af te knou nie. Dit is ’n instinktiewe reaksie omdat hy so ’n aggressiewe speler is, en juis daarom is dit so belangrik dat hy daardie rooi waas afskud.”
Du Randt glo Botha se optrede het die beeld van Springbok-rugby skade aangedoen.
“Ongelukkig so, ja. Daardie beeld van Bakkies gaan vir die volgende paar weke die manier wees hoe mense die Springbokke gaan sien. Ons sal dit egter kan verander met goeie rugby. ”
Volgens Du Randt gaan dit aanvanklik sake vir die Springbokke bemoeilik.
“Die skeidsregters gaan gewis enige sweem van ongeoorloofde spel van die Springbokke looi.”
Bly op hoogte van al die jongste sportnuus deur Nuus24Sport op Twitter te volg.
- Sport24