Onkeerbare Bulls
2011-05-29 08:00
Pretoria - ’n Paar weke gelede sou mense skouerophalend oor die Bulls se Superrugby-wentelling van 32-21 oor die Cheetahs gewees het, maar intussen het die Bloemfonteiners ’n hele paar spanne op hul neuse laat kyk.
En dié oorwinning het bevestig wat ’n paar mense al ’n rukkie vermoed het, maar nie sommer hard-op wou sê nie: ongeag hul swak begin aan vanjaar se nuwe kompetisie, is niemand vanoggend meer lus om teen die Pretorianers te moet speel nie.
Hul loting in ’n moontlike uitspeelronde kan teen hulle tel: dis hier op Fort Loftus dat die Bulls op hul genadelose beste is, maar ’n vierde plek op die punteleer raak ’n sterk moontlikheid.
Van hul volgende drie kragmetings – teen die Waratahs en Sharks hier en die Stormers op Nuweland – sal die kampioene minstens twee moet wen, maar dit lyk allermins vergesog noudat hulle hul ritme en selfvertroue terug het.
Almal gaan oor spelpatrone tekere, maar die Bulls was reg: dit was hul vorm wat gehaper het en nie hul idees nie. Nou’s die vorm reg – en die stemme wat Victor Matfield en kie. oor die muur verklaar het, tjoepstil.
Punte aan die Cheetahs vir hul kanniedood-gees: nadat dit goed twee maal gelyk het of hulle uitgeknikker is, het die besoekers aanhou en aanhou en tot in die doodsnikke ’n buitekans gestaan.
Die Vrystaat het genoeg vernuf en manne wat ’n wedstryd op sy kop kan maak staan, maar het Saterdag selde van die voorvoet af gespeel en was op hul gevaarlikste wanneer die flank Ashley Johnson ’n bietjie ruimte gekry het.
Die Blikore se gesukkel het, voorspelbaar genoeg, in die lynstane begin. Voorspelbaar genoeg, want nie net het die Cheetahs die afgelope ruk hul drie beste middelspringers verloor met beserings aan Wilhelm Steenkamp, Waltie Vermeulen en Izak van der Westhuizen nie – Saterdagaand het hulle boonop te doen gekry met Victor Matfield in die anderkantste ry.
Dít het die Cheetahs se taak soveel bemoeilik as wat dit die Bulls s’n vergemaklik het – dit het nie juis gebaat hulle skop vir veldposisie nie, want die Bulls het die bal eenvoudig silwerskoon teruggekry. Terselfdertyd kon die tuisspan die kantlyn opsoek met die gerieflike wete dat hy ’n uitstekende kans staan om die bal te herwin.
Die gevolg was dat die Cheetahs hul kunsies in hul eie halfgebied moes probeer uitstal, waar die Bulls eenvoudig genoeg druk op hulle gelaai het dat hulle nie hiervandaan kon hond haar-af maak nie.
Die Cheetahs-verdediging is ná al hierdie druk uiteindelik halsoorkop getrek – en Danie Rossouw se haastige tweekuns middeldeur die tweede helfte het eintlik bloot die formaliteite voltrek. Vir sy eerste het hy ’n yslike kraglopie in die middel af geloods en nommer 2 was die gevolg van ’n behendige dartellopie deur Morné Steyn.
’n Geel kaart vir die Cheetahs-stut Coenie Oosthuizen nadat hy Zane Kirchener in die lug geloop het, het die kroon gespan, hoewel Ashley Johnson en kie. daarvoor gesorg het dat die eindtelling respektabel gebly het.
Johnson was nogmaals op sy kop vir die Vrystaters, maar die tonge sou Saterdagaand in die middel van die land klap oor die jong flank Johan Wessels, wat Kabamba Floors ná ’n besering vervang het en homself deeglik laat geld het op die grond.
Dit was nie ’n volpunt-vertoning deur die wenspan nie, maar dié het ál 5 punte verdien.
Vir die jongste sportnuus volg Nuus24Sport op Twitter
- Sport24