Noorde se hoop nou op Pukke
2010-09-21 09:33
Stellenbosch - Die noorde van Suid-Afrika se hoop op die nasionale klubrugby-kroon rus nou vierkant op die skouers van die Pukke van Potchefstroom.
Die halfeindronde van die Nasionale Klubkampioenskappe word Woensdag hier in die Eikestad beslis.
En terwyl die Maties en die verdedigende kampioen, Hamiltons, vir Wes-Kapenaars ’n plaaslike halfeind-derby verseker het, het College Rovers van KwaZulu-Natal die Universiteit van Johannesburg (UJ) gister in die enigste werklik mededingende kwarteindstryd met 26-20 uitgeskakel.
Die Pukke is nog nie in vanjaar se toernooi getoets nie en het Roses United van Wellington gister met 90-14 slae gegee.
Roses is die einste span wat die Shimlas Saterdag met 23-22 geklop het, maar toe hulle gister met rustyd reeds met 0-68 agter was, was die skrif aan die muur.
Hul twee drieë in die tweede helfte sou nooit genoeg gewees het teen die 14 van die Pukke nie.
Roses se oopkantflank, Hyco Jacobs, is vir ’n blatante kopstampery ’n rooikaart gewys.
Die Maties het ondanks Springs se reuse-oorwinning op die eerste dag nooit die gevaar geloop om hul kragmeting gister te verloor nie.
Hoewel die besoekers Maties se skrum verbasend goed in toom gehou het, was die Stellenbossers goed genoeg om rustyd met 20-13 voor te loop en eindelik met 49-27 te wen.
Hoewel Hamiltons sy titel met oënskynlik ’n swakker span as verlede jaar verdedig, lees sy telkaarte glad nie so nie.
Vra maar vir Progress van Uitenhage. ’n Nederlaag van 14-76 maak seer.
In die Plaat-afdeling het die Shimlas vir sy teleurstellende begin teen Roses vergoed en Middelburg met 41-10 geklop.
Tukkies het min moeite gehad om die Bethlehem-Bobbies met 52-19 te klop.
En die Mosselbaai Barbarians het Kimberley-Polisie met 32-31 in die tjoekie gesit.
Bly op hoogte van al die jongste sportnuus deur Nuus24Sport op Twitter te volg.
- Sport24