Nóg beserings tref Leeus

2012-09-17 13:48

Johannesburg – Die Goue Leeus moes vier spelers aan beserings afstaan ná hul sege van 38-23 Saterdag oor die Cheetahs in Bloemfontein.

Die heelagter Jaco Taute en slot Hendrik Roodt, wat albei onlangs van beserings herstel het, is wéér op die krukkelys.

Roodt sal waarskynklik die res van die seisoen misloop nadat hy sy skouer ontrwig het terwyl Taute met 'n gewrigbesering sukkel. 

Die flank Willi Britz en vleuel Deon Helberg is ook buite aksie met gewrig- en enkelbeserings.

Die Leeus is reeds sonder die skrumskakel Whestley Moolman (arm) en slot Stephan Greeff (been) vir die res van die seisoen.

Derick Minnie (knie), losskakel Guy Cronjé (dyspier) en senter Waylon Murray (knie) is besig om te herstel en behoort binne die volgende twee tot drie weke terug te wees op die veld.

'n Brokkie goeie nuus is dat die flank Jaco Kriel en stut CJ van der Linde Maandag by hul spanmaats aangesluit het.

Vir die jongste sportnuus volg Nuus24Sport op Twitter.

– Sport24