Mujati straks vir Bokke verlore

2012-11-06 08:54

Dublin – Volgens berigte in Ierland kan Heinke van der Merwe straks die jongste speler wees wat hom by die Springbokke se toergroep aansluit.

Die Bokke se plan om die vaskopstut Brian Mujati nader te trek vir hul Europese toer is in die wiele gery omdat Mujati nie 'n Suid-Afrikaanse paspoort het of in dié land bly nie.

Dit was dieselfde kwessie wat Mujati uit verlede jaar se Wêreldbeker in Nieu-Seeland gehou het.

Van der Merwe speel vir die Ierse klubspan Leinster en is een van verskeie Suid-Afrikaanse stutte wat tans in Europa beïndruk.

Suid-Afrika se afrigter, Heyneke Meyer, wou Maandag nie die beseerde Francois Louw se status bevestig nie, maar Bath se direkteur van rugby, Gary Gold, het gesê dié baljagter sukkel steeds met 'n nekbesering.

Marcel Coetzee sal straks teen die Iere uitdraf as Louw nie betyds herstel nie.

Afskoptyd Saterdag in Dublin is om 19:30.

Vir die jongste sportnuus volg Nuus24Sport op Twitter.