Morné Steyn geskors

2012-10-24 07:27

Kaapstad – Die Springbok- en Blou Bul-losskakel Morné Steyn is vir 'n week geskors nadat hy Dinsdag deur 'n Saru-tugbeampte vir vuilspel skuldig bevind is.

Steyn is in verlede Saterdag se Curriebeker-halfeindstryd teen die Haaie in Durban uitgewys nadat hy 'n opponent met 'n stywe arm geloop het.

Die tugbeampte Louis Booyse het Steyn tot 28 Oktober geskors, maar met die Bulle wat reeds uit die Curriebeker-reeks is en die Springbokke wat eers in November weer speel sal die losskakel geen wedstryde misloop nie.

Intussen het Steyn se spanmaat Morné Mellet, wat uitgewys is nadat hy Patrick Lambie na bewering gepooitjie het, skorsing vrygespring.

Booyse het bevind dat Mellett se geelkaart, wat hy tydens die wedstryd ontvang het, voldoende straf onder die omstandighede was.

Vir die jongste sportnuus volg Nuus24Sport op Twitter.

– Sport24