Mitchell skiet gerugte af
2011-10-11 11:05
Johannesburg – John Plumtree moet geen gunsies van John Mitchell verwag wanneer dié twee Nieu-Seelandse afrigters en vriende se rugbyspanne Saterdag in Durban ontmoet nie.
Mitchell, afrigter van die Goue Leeus, het sprake dat hy ’n B-span na Durban gaan stuur Maandag ontken.
Die Leeus het hul plek bo-aan die Curriebeker-puntelys met ’n pragoorwinning oor die Westelike Provinsie verseker.
Tog is Mitchell lugtig vir die moontlikheid dat sy span momentum kan verloor indien hy nie ’n sterk span teen Plumtree se Haaie loslaat nie.
“Ek gaan steeds die kern van die span behou. Ons wil dan ook darem seker maak ons is voorbereid vir enige moontlike scenario wanneer die halfeindronde kom,” het Mitchell gesê.
Hy kan dus wel enkele van sy plaasvervangers in die beginspan speelkans teen die Haaie gee, maar dit lyk nie of die span in sy geheel verander gaan word nie.
Spelers soos David Bulbring (slot), Rudy Paige (skrumskakel), Burton Francis (losskakel) en James Kamana (heelagter) sal dalk hul kanse kry.
Mitchell het selfs gesê hy het nog nie oorweeg of hy sy enigste terugkerende Springbok, Butch James, teen die Haaie gaan gebruik nie.
Hoewel die Leeus-afrigter gesê het hy is trots op sy span nadat hy eerste op die puntelys geëindig het, is dit nie naastenby waar hul ambisie eindig nie.
“Dit is net doelwit nommer een. Dit was nie ’n maklike doelwit nie.
“Maar al wat dit doen, is om vir ons ’n geleentheid te gee (vir ’n tuishalfeindstryd).
“Ons het nog niks tasbaars gewen nie. Die werk is nog nie klaar nie, al was dit lekker om die spelers vir die eerste doelwit geluk te wens,” het Mitchell gesê.
Hy het wel met “glad nie” geantwoord toe hy gevra is of sy vriend Plumtree ’n guns van die Leeus kan verwag.
As die Haaie die Leeus klop, sal hulle ook van ’n halfeindstryd op hul tuisveld verseker wees.
Mitchell het ook gesê die Leeus is die eerste keer in verskeie weke beseringsvry ná die oorwinning van 42-25 oor die WP.
Boonop is die span daardeur met selfvertroue gelaai met ’n speler soos Jaco Taute wat as heelagter sy beste vertoning van die reeks gelewer het.
– Vir die jongste sportnuus volg Nuus24Sport op Twitter.
- Beeld