Mitchell en Mordt in Leeus se visier
2010-05-19 09:17
Pieter Jordaan
Johannesburg - John Mitchell, afrigter van die Western Force, glo hy kan sy horisonne as afrigter verbreed as hy deur die Goue Leeus Rugbyunie (GLRU) as dié span se Curriebeker-afrigter vir 2010 aangestel word.
Mitchell het onlangs aan Sport24 erken dat die GLRU met hom onderhandel om die Curriebeker-leisels oor te neem.
Hy het dit ook beklemtoon dat hy geensins van plan is om sy bande met die Force te verbreek nie.
Aangesien Mitchell jaarliks ná die Super14-reeks geen ware afrigtingsverpligtinge het nie, oorweeg hy om in sy verloftydperk die Leeus af te rig.
Tog het sowel Mitchell as die GLRU al gesê geen amptelike aanstelling is nog gedoen nie.
Boonop is die voormalige Springbok-vleuel Ray Mordt glo ook in die wedloop om die Leeus te brei.
Die direkteur van rugby, Dick Muir, is weens sy verpligtinge as Springbok-hulpafrigter nie beskikbaar nie.
Mordt het die Lions vanjaar vlugtig in die Super14-reeks bygestaan toe dit duidelik geword het dat daar iets met die span se verdediging skort.
As Mitchell aangestel word, sal hy volgende jaar na die Force terugkeer om dié span ’n laaste keer in die Super14-reeks af te rig. Hy beplan dus nie ’n langtermyn-skuif Goudstad toe nie.
“Ek is hier (by die Force) tot aan die einde van my kontrak volgende jaar, so ek sal hulle afrig,” het Mitchell aan AAP gesê,
“Daar was slegs gesprekke oor afrigting (by die Leeus) in die Curriebeker-reeks tussen nou en volgende jaar se Super14.
“Ek is geregtig op my jaarlikse verlof, maar ek kan steeds my pligte hier (by die Force) nakom.
“Afgesien van beplanning en hersiening, het ek die afgelope vyf jaar bitter min in dié tyd (tydens die Curriebeker-reeks) gedoen.”
Mitchell glo hy kan boonop baie as afrigter leer deur tyd saam met ’n Suid-Afrikaanse span deur te bring.
Vir die Leeus behoort die aanstelling van ’n Curriebeker-afrigter ’n uiters belangrike saak te wees.
Dit is duidelik dat die Rooibontes in die Curriebeker-reeks etlike treë vooruit moet gee as hulle ’n herhaling van vanjaar se Super14-fiasko wil voorkom toe die Lions nie een wedstryd gewen het nie.
Intussen onderhandel die Sharks met die voormalige Leeus-losskakel André Pretorius om vanjaar vir die Kwazulu/Natallers Curriebekerrugby te speel.
Pretorius sou vanjaar vir die Force in die Super14-reeks gespeel het, maar sy seisoen is die soveelste keer deur ’n besering kortgeknip.
Die Sharks het gister bevestig dat Pretorius se beserings eers onder oënskou sal kom alvorens hulle hom sal betrek.
Die Force oorweeg dit ook om Pretorius (31) weer in 2011 te gebruik, mits hy hulle kan oortuig dat hy van waarde kan wees.
Bly op hoogte van al die jongste sportnuus deur Nuus24Sport op Twitter te volg.
- Sport24