Mitchell dalk uit Leeukuil geskop
2012-06-22 07:30
Kaapstad – John Mitchell se pos as afrigter van die Lions is in gedrang nadat 'n groep spelers persoonlike griewe voorgelê het oor die manier waarop hy hulle behandel, berig Beeld.
Kevin de Klerk, president van die Goue Leeus Rugbyunie (GLRU), het vroeër vandeesweek klagtes van sommige van die spelers ontvang oor die "onredelike wyse" waarop Mitchell hulle glo behandel.
Die bestuur van die Lions probeer hard om die orde te herstel, maar die vraag is nou of die onenigheid tussen Mitchell en die spelers beredder kan word, aangesien daar skynbaar ’n vertrouensbreuk tussen hulle ontstaan het te midde van die Lions se gesukkel in die Super-reeks.
Mitchell is aan die rugbywêreld bekend as ’n breier wat nie doekies omdraai nie.
Soortgelyke klagtes teen hom is in 2008 deur die Western Force ondersoek nadat die meeste van dié span se spelers keelvol geraak het vir sy streng afrigtingsmetodes. Hy het die Force tot 2010 afgerig. Mitchell was ook ongewild as All Black-afrigter en het ná 2003 se Wêreldbeker-toernooi die trekpas gekry.
Die Lions, wat slegs twee uit 13 wedstryde gewen het, beklee tans die tweede laaste posisie op die algehele Super-rugbypunteleer.
Hulle sal laaste eindig in die Suid-Afrikaanse Konferensie en sal in alle waarskynlikheid deur die Southern Kings vervang word in volgende jaar se toernooi, berig Sport24.
Die Johannesburgse span se oorblywende wedstryde is teen die Stormers in Kaapstad (30 Junie), die Rebels (7 Julie) en die Bulls in Pretoria (14 Julie).
– Volg Nuus24Sport op Twitter
