Mitchell bly by Leeus
2010-09-02 13:18
Johannesburg – Die Super15-rugbyspan van die Western Force het John Mitchell van sy kontrak vrygestel om afrigter van die Leeus vir die volgende drie jaar te wees.
Dié aankondiging is Donderdag deur die president van die Goue Leeus Rugbyunie (GLRU), Kevin de Klerk, en die uitvoerende hoof, Manie Reyneke, gemaak.
Mitchell, ‘n voormalige All Black-losvoorspeler, was vanjaar tydelik as konsultant van die Leeus aangestel.
“Sedert John vanjaar by ons aangesluit het, was ons baie beïndruk met sy vermoë om in elke aspek van die afrigting struktuur te kan werk,” het de Klerk gesê.
“Dit was nooit ‘n geheim dat ons John vir ‘n langer tydperk wou aanstel nie. Maar ons het ook geweet dat dit altyd onderworpe sou wees aan die Western Force se instemming om hom vroeër van sy kontrak vry te stel,” het hy bygevoeg.
Die Springbokke se hulpafrigter Dick Muir is steeds die Leeus se direkteur van rugby, met Mitchell wat as hoof-afrigter die leisels neem.
De Klerk het gesê Mitchell sal die Leeus ook vir die Super15 afrig.
As oud-afrigter van die All Blacks het Mitchell ‘n 100% wenrekord van sewe oorwinnings teen die Springbokke.
Die All Blacks het 23 van hul 27 toetse gewen terwyl Mitchell afrigter van die Kiwi's was.
Bly op hoogte van al die jongste sportnuus deur Nuus24Sport op Twitter te volg.
- Sport24