Meyer voel jammer vir Brüssow
2012-06-04 23:01
Durban – Die Springbok-afrigter, Heyneke Meyer, sê dit was ‘n moeilike keuse om die Cheetahs-flank Heinrich Brüssow uit die Springbok-groep te laat, maar hy glo dié baljagter sal in die toekoms terugkeer.
Brüssow, ‘n sleutelspeler in die wêreldbekergroep en iemand wat beskou is as ‘n uiters belangrike baljagter vir die Springbokke by die afbreekpunte, se weglating was een van die verrassings toe Meyer sy groep vir die opkomende toetsreeks teen Engeland aangekondig het.
Meyer het gesê hy is tevrede met sy keuses en dat Brüssow se weglating tydelik en ‘n taktiese aanpassing vir die reeks teen Engeland is. Die “kern” van die spelers is slegs vir die drie toetse teen Engeland, het Meyer gesê.
“Daar sal altyd kritiek wees, maar ek sal graag wil hê die land moet agter die span staan. Ek dink dit is die beste groep om mee vorentoe te gaan, elke ou moet nou sy hand opsteek en wys dat hy in die span moet wees.
“Heinrich Brüssow is ‘n briljante speler en ek dink dit is net ‘n kwessie van tyd voor hy weer gekies word. Die spel verander gedurig en jy moet die regte spelers vir die regte wedstryd kies. Ek voel werklik jammer dat hy nie in die span is nie, maar ek voel ook bly vir die jong spelers wat wel gekies is.”
Brüssow is ‘n baljagter en hy is bes moontlik uit die groep gelaat weens veranderinge aan die reëlinterpretasies wat lei tot meer strafskoppe by die afbreekpunte teen sy soort speler.
“Dit was ‘n moeilike keuse, aangesien Heinrich steeds een van die beste oopkantflanke in die spel is, maar die spel het verander. Hulle word nou meer gestraf en hakers steel nou meer balle,” het Meyer gesê.
“As die reëls verander – en hulle sal – dan sal hy definitief weer oorweeg word. Maar op die oomblik moet hy aanpas by die reëls.”
Die Springbokke takel Engeland Saterdag in Durban, voordat hulle in Johannesburg (16 Junie) en Port Elizabeth (23 Junie) teen die toerspan speel.
“Natuurlik het hulle baie tyd gehad om voor te berei en hulle het baie goed gevaar in die Sesnasies,” het Meyer oor Engeland gesê. “Ek wil egter regtig fokus op ons spelers en die tyd wat ons het.”
- Volg Nuus24Sport op Twitter
- AP
