Meyer trek dalk later Kaap toe
2012-01-31 07:01
Pretoria. – Hy gaan vir eers nêrens nie, maar Heyneke Meyer, die Blou Bulle se nuwe Springbok-afrigter, erken dat hy dalk later in sy ampstermyn Kaapstad toe kan trek.
Net die tyd sal leer wat die beste vir hom en sy gesin sal wees, het Meyer gesê.
“Ek gaan die volgende paar maande in elk geval die land deurreis om by al die streekspanne uit te kom en ek is ook van plan om by spelers wat tans in die buiteland speel, uit te kom.
“Daarom voel ek dit is beter om vir eers net hier te bly, want dan het ek ten minste ’n vaste basis,” het Meyer gesê.
“Ek het ook kinders in die skool en wil hulle nie sommer ontwrig nie.”
Meyer is wel die 12de Bok-afrigter sedert Suid-Afrika se hertoetrede tot internasionale rugby in 1992, maar slegs die tweede wat tydens sy aanstelling in die Jakarandastad gewoon het. Die ander was dr. John Williams, die Bokke se eerste breier ná isolasie.
Tradisioneel het die vorige breiers almal in Kaapstad, waar die Suid-Afrikaanse Rugbyunie se hoofkantoor is, gebly.
“Ek dink nie dit gaan aan die begin saak maak waar ’n mens bly nie, maar sal later sien wat die beste gaan wees.
“Dit gaan uiteindelik wat in die beste belang vir die span gaan wees en nie wat my die beste gaan pas nie.”
Hy het vrese van Bulls-ondersteuners besweer dat hy dié unie van sy kundige bestuurspan gaan stroop.
“Ek dink dit is belangrik dat ons die beste mense het by die Springbok-span, maar almal van hulle is nie noodwendig in Pretoria en by die Blou Bulle betrokke nie.”
Meyer behoort vandag amptelik sy bedanking by die Bulls in te dien en val op 1 Februarie in sy nuwe pos in.
– Sport24
– Bly op hoogte van al die jongste sportnuus deur Nuus24Sport op Twitter te volg