Maties, NMMU wen in doodsnikke
2012-02-13 22:05
Kaapstad – Drie weg-oorwinnings is in die tweede ronde van die 2012 Varsity Cup behaal – met twee dramatiese oorwinnings in die laaste sekondes in Potchefstroom en Bloemfontein.
In maklik die grootste skok-oorwinning in die geskiedenis van die toernooi het die NMMU Madibaz vir Shimlas geklop, te danke aan ‘n drie deur André Goosen in die laaste sekondes van die wedstryd in Bloemfontein. Die besoekers het twee drieë in die laaste drie minute gedruk en met 29-27 geseëvier.
Die voormalige kampioene Maties het ook ‘n oorwinning behaal toe hulle in Potchefstroom teen die NWU-Pukke laat in die wedstryd ‘n drie gedruk het. Nadat Maties die hele tweede helfte lank 9-12 agter was, het die plaasvervanger-haker Gareth Light in die 80ste minuut oorgeval ná ‘n sterk rolmaalbeweging. Dit het aan die Maties ‘n oorwinning van 14-12 besorg.
Die verdedigende kampioene, UCT, het met 15-29 teen UJ verloor in Johannesburg. UCT is steeds sonder punte in vanjaar se kompetisie.
In Maandag se eerste wedstryd het UP-Tuks, die besoekers, hul Pretoria-derbywedstryd teen TUT maklik met 40-0 gewen. Hulle het vyf drieë gedruk, insluitende ‘n strafdrie in die doodsnikke van die wedstryd.
- Volg Nuus24Sport op Twitter
