Matfield sluit aan by Bulls se personeel
2011-12-05 21:57
Johannesburg – Die voormalige Bulls- en Springbokslot Victor Matfield sal by die Bulls aansluit op ‘n konsultantbasis vir die 2012 Super Rugby-seisoen.
Matfield sal as ‘n spesialis-afrigter ingespan word. Hy sal op ‘n weeklikse basis op lynstaanspel en algemene voorspelerspel fokus.
Die mees ervare slot in Springbokrugby begin binnekort ‘n nuwe loopbaan in die uitsaaiwese, maar is toestemming gegun om die Bulls as konsultant by te staan.
“Dit is goeie nuus vir ons,” het die Bulls se hoof van rugby, Heyneke Meyer, gesê.
“Victor was vir baie seisoene die ruggraat van die Bulls en om steeds sy teenwoordigheid in die span te hê, al is dit ongelukkig nie meer as speler nie, is vir ons ‘n regte bonus.”
“Hy word algemeen herken as een van die beste lynstaan-analiste in die spel en ons is trots en geëerd om hom by ons te hê.”
Matfield is ook opgewonde oor die geleentheid.
“Ek is baie opgewonde om betrokke te raak [by televisie] en sal dit alles gee, maar dit is geen geheim dat ek by afrigtingwerk ook betrokke wil raak nie. Hierdie sal vir my die geleentheid gee om albei te doen, iets waaroor ek baie gelukkig is.”
- Volg Nuus24Sport op Twitter
- SAPA