Matfield: 'Moenie Barbarians afskryf'
2011-11-27 20:55
Londen – Die Springbok-legende Victor Matfield het gesê mense moet nie die Barbarians afskryf na hul nederlaag teen Australië op Twickenham nie.
Die nederlaag van 60-11 was die slot se laaste wedstryd voor sy uittrede.
Sedert rugby professioneel gespeel is, bestaan daar twyfel of die wêreld se bekendste uitnodigingspan met die topspanne van professionele wêreldrugby sal kan kompeteer.
"As mens vir die Barbarians uitdraf, het mens nie baie geoefen nie," het Matfield gesê. "Party dae werk dinge uit, ander dae sukkel jy."
“Die Barbarians het twee uit drie wedstryde die afgelope drie jaar teen spanne van die suidelike halfrond gewen,” het hy bygevoeg. “Hoekom sal mens die span dan wil afskryf na een swak vertoning?”
Die Barbarians het in 2009 die All Blacks en in 2010 die Springbokke op Twickenham geklop.
– Vir die jongste sportnuus volg Nuus24Sport op Twitter.