Marius Jonker bêre toetsfluitjie

2012-12-05 10:04

Kaapstad – Die Suid-Afrikaanse blaser Marius Jonker het sy uittrede as internasionale skeidsregter aangekondig.

Hy sal egter steeds in plaaslike kompetisies blaas.

Die 44-jarige Jonker het sy besluit Woensdag bekendgemaak ná besprekings met André Watson, Suid-Afrika se skeidsregterbaas.

"Ek het my internasionale loopbaan terdeë geniet, maar die tyd het gekom om aan te skuif," het Jonker gesê.

"Ek het steeds 'n passie om skeidsregter te wees en sal voortgaan om op Curriebeker- en Vodacombeker-vlak asook ander Saru-kompetisies te blaas."

Jonker was skeidsregter in 24 toetse en het sy eerste toetswedstryd in 2005 geblaas.

"Marius word reeds vir 'n aantal jare as een van die top-blasers in wêreldrugby beskou," het Watson gesê.

"Hy het Saru, Sanzar en die IRR vir 'n lang tydperk met onderskeiding gedien. Ek glo dat hy nie die erkenning ontvang het wat hy verdien nie, maar wat belangrik is is dat Saru sy ervaring vir die volgende paar seisoene aan die jonger skeidsregters oordra.

Vir die jongste sportnuus volg Nuus24Sport op Twitter.

– Sport24