Mapoe en VS moet langer wag
2010-08-06 07:20
Bloemfontein - Die Blitsbok Lionel Mapoe kan volgende week hoor of hy wettiglik nuwe spanmaats gaan kry of nie.
Mapoe se arbitrasiesaak oor sy kontrakgeskil tussen die Vrystaat en die Haaie is Donderdag hier aangehoor en uitspraak daaroor word vroeg volgende week verwag.
Die vleuel oefen reeds van voor die Curriebeker-reeks saam met die Haaie, maar kan nie vir die Durbaniete speel nie omdat hy volgens die Vrystaat ’n geldige kontrak met hom het.
Die Vrystaat weier om ’n sertifikaat van vrystelling aan die Mapoe uit te reik.
Uitspraak deur adv. Bertus van Rhyn, die arbiter in die saak, is gister voorbehou en daar word verwag dat hy reeds volgende week kan aandui vir wie Mapoe in die Curriebeker-reeks mag uitdraf.
Van Rhyn het ook vroeër vanjaar die skrumskakel JP Joubert se arbitrasiesaak oor sy kontrakgeskil tussen die Vrystaat en die Leeus hanteer.
Hy het toe beslis dat Joubert, wat hom voor die Super14-reeks by die Lions aangesluit het, daarop geregtig is om vir die Leeus te mag speel.
Volgens Harold Verster, president van die Vrystaatse Rugbyunie, het Van Rhyn gesê hy besef dit is ’n dringende saak en sal hy so gou as moontlik daaraan aandag gee.
Die Vrystaat sal hoop hy kan ’n slag met Mapoe slaan in sy wedywering met die Haaie om spelers se dienste te bekom.
Sport24 se ekslusiewe onthulling dat die Springbok-senter Meyer Bosman hom na die Curriebeker-reeks by die Haaie gaan aansluit is onder meer vandeesweek bevestig.
Dan het die voormalige Vrystater en oud-leerling van Grey-kollege Piet Lindeque verlede Saterdag gehelp om die Vrystaat se o.19-rugbyspan hier te verslaan.
Dié senter het die Haaie se eerste van vier drieë in hul sege van 33-13 oor die tuisspan gedruk.
Boonop het die Haaie ook reeds die dienste van die belowende senter van Grey-kollege Paul Jordaan bekom.
Jordaan was vanjaar ’n uitblinker vir die Vrystaat se Cravenweek-span wat as nie-amptelike kampioen in Welkom gekroon is.
Bly op hoogte van al die jongste sportnuus deur Nuus24Sport op Twitter te volg.
- Sport24