'Maak Rhule 'n Bok' – Gysie Pienaar
2012-10-10 07:46
Kaapstad – Die voormalige Springbok-heelagter Gysie Pienaar sê die nasionale keurders moet dit ernstig oorweeg om die Vrystaat-blits Raymond Rhule op te roep.
Die 19-jarige vleuel het in vanjaar se Curriebeker-reeks vir die Cheetahs beïndruk en sy agt drieë is tans die meeste in die reeks.
"Hy is een van die beste spelers wat ek nog gesien het," het Pienaar aan Volksblad gesê.
"En wat my regtig opgewonde maak is dat hy die gapings op die veld uitsoek en aanval en nie sy opponente nie. Dit is 'n teken van 'n speler met visie."
"As ek die Bok-keurders was sou ek hom vir die jaareind-toer na Europa oorweeg het. Hy is sterk en baie fisiek. As hy sy spelpeil handhaaf gaan hy 'n lang, suksesvolle Springbok-loopbaan hê," het Pienaar gesê.
Rhule is op linkervleuel gekies vir Saterdag se Curriebeker-stryd teen die WP op Nuweland.
Met die Cheetahs wat tans in die laaste plek op die punteleer is, sal 'n nederlaag in Kaapstad straks beteken dat die span in 'n promosie/relegasie-wedstryd teen die OP Kings sal moet speel.
Die afrigter Naka Drotské het Dinsdag slegs een verandering aan sy span, wat laas naweek met 30-37 teen die Haaie verloor het, gemaak.
Hendro Scholtz vervang Lappies Labuschagné, wat 'n stamp teen die kop gekry het, op flank.
Afskoptyd op Nuweland is om 17:05.
So lyk die span:
15 Hennie Daniller, 14 Nico Scheepers, 13 Robert Ebersohn, 12 Andries Strauss, 11 Raymond Rhule, 10 Sias Ebersohn, 9 Sarel Pretorius, 8 Philip van der Walt, 7 Francois Uys, 6 Hendro Scholtz, 5 Izak van der Westhuizen, 4 Carl Wegner, 3 Coenie Oosthuizen, 2 Adriaan Strauss (kaptein), 1 Marcel van der Merwe.
Plaasvervangers: 16 Hercu Liebenberg, 17 Ross Geldenhuys, 18 Waltie Vermeulen, 19 Davon Raubenheimer, 20 Tewis de Bruyn, 21 Philip Snyman, 22 Rayno Benjamin.
Vir die jongste sportnuus volg Nuus24Sport op Twitter.
– Sport24
