Luke sal Bok-trui ‘met trots’ dra
2011-05-18 09:57
Luke Watson sal ’n Springbok-rugbytrui “met trots” dra as die geleentheid hom weer voordoen.
Die omstrede voormalige losvoorspeler van die Sharks en Westelike Provinsie het gister in die Moederstad bevestig dat hy steeds die ambisie koester om sy land te verteenwoordig.
Watson (27) het pas by Bath in Engeland klaargemaak en begin Maandag saam met die Kings in Port Elizabeth te oefen.
“As ek weer die kans kry om my land te verteenwoordig, sal ek dit met groot trots doen,” het Watson gesê.
“Ek sou baie graag weer die geleentheid wil hê, maar of dit gaan kom, is ’n heel ander saak. Maar ja, dit sal wonderlik wees.”
Dis egter onwaarskynlik dat Watson al vanjaar weer ’n proesel van toetsrugby sal kry. Suid-Afrika se beskikbare talent en die gepaardgaande spandinamika laat dit waarskynlik nie toe nie, terwyl Watson ook nie voor 2013 Super Rugby gaan speel nie.
Hy het gister gesê dat hy slegs vir spanne van die Oostelike Provinsie beskikbaar sal wees en nie volgende jaar by ’n Super-span sal inskakel nie. Die Suid-Afrikaanse Rugbyunie (Saru) het reeds besluit dat die Kings in 2013 Super Rugby sal speel.
“Dis deel van my ooreenkoms met die Kings.
“Ek wil saam met die span ontwikkel.
“Ek het al onder puik afrigters gespeel en moenie verbaas wees as jy van die Westelike Provinsie se bewegings daar sien nie!”
Watson werk met die veronderstelling dat die Kings in 2013 Super Rugby-status sal kry en glo Suid-Afrika het genoeg spelers om hulle in Super Rugby te huisves.
“Australië het vinnig nuwe spanne op die been gebring en niemand kan vir my vertel dat Suid-Afrika nie ’n groter talentpoel as enige ander rugbynasie het nie. Ek glo ons kan in 2013 meer mededingend wees as van die ander nuwe spanne wat op die been gebring is.”
Watson sal natuurlik dadelik ’n sterk kandidaat vir die Oos-Kapenaars se kapteinskap wees, maar dis nie by hom ’n prioriteit nie.
“Ek wil nooit in ’n omgewing instap met die vooropgestelde idee dat ek ’n leier is nie, want ek dink nie dis hoe leierskap benader moet word nie,” het hy gesê.
“Ek het in Bath geleer dat ’n leier en kaptein natuurlik in ’n span ontwikkel.
“Toe Bath my aan die einde van my eerste seisoen gevra het om die kaptein te wees, het ek gesê op voorwaarde dat daar individueel met elke ander speler eers gepraat word.
“As daar enige kwessies sou wees, moes dit eers aangespreek word.”
Volgens Watson was dit die Kings se afrigter, Alan Solomons, wat hom oortuig het om saam met sy jong gesin terug Baai toe te kom.
“Ek was eintlik onseker oor die skuif voor ek met hom gesels het.
“Solly het visie.
“Hy droom groot en kan ’n visie skep vir die rigting wat hy wil inslaan.
“Ek het aan die einde van verlede jaar met hom gesels toe hy die Barbarians in Londen help afrig het en daardie vergadering het ’n groot invloed op my besluit gehad.”
- Volg Nuus24 op Twitter.
- Sport24