Ludik se seisoen verby en ...
2011-09-27 10:00
Durban – Louis Ludik se rugbyseisoen is iets van die verlede.
Dié heelagter van die Haaie se span het Vrydagaand teen Griekwas ’n beentjie in sy voet gebreek en sal nie weer vanjaar op die rugbyveld gesien word nie.
Ludik het die besering opgedoen enkele minute nadat hy in die tweede helfte as plaasvervanger op die veld verskyn het.
Dit is nie waar die Haaie se beseringsprobleme ophou nie.
Hulle sal in Saterdag se Curriebeker-wedstryd in Durban teen die Westelike Provinsie ook sonder die haker Craig Burden moet klaarkom.
En die slot Anton Bresler moet eers Donderdag ’n fiksheidstoets slaag voordat hy teen die Streeptruie kan diens doen.
Hy het sy enkel beseer in die sukkelsege oor Griekwas.
Die Springbok-agtsteman Ryan Kankowski besoek aanstaande Woensdag ’n spesialis wanneer die pen uit sy gebreekte hand verwyder word.
Volgens Ewoudt van der Linde, die spandokter, is die Haaie hoopvol dat Kankowski en Burden albei oorweeg kan word vir die laaste ligawedstryd, oor drie weke teen die Leeus in Durban.
Ludik het die laaste twee Curriebeker-wedstryde op die plaasvervangersbank begin, met Stefan Terblanche wat bo hom as heelagter verkies is.
Die vaskopstut Wiehahn Herbst het ook ’n liesbesering waarmee hy al geruime tyd sukkel, vererger toe hy as plaasvervanger teen die Noord-Kapenaars gespeel het.
“Ons raak ál meer uitgedun en dinge lyk nie baie goed nie,” het John Plumtree, die Haaie se afrigter, gister gesê.
“Hoe harder ons probeer om die peil te herwin wat ons verlede jaar die kampioene gemaak het, hoe slegter speel ons,” het hy van die getjommel teen Griekwas gesê.
Vir die jongste sportnuus volg Nuus24Sport op Twitter.
– Sport24