Loftus sê nee vir sy Liefling
2011-11-30 09:03
Doebai. – Die “liefdesverhouding” tussen die Bulls en hul voormalige “Liefling” is weer op die rotse nadat informele gesprekke om Derick Hougaard weer terug te kry in Pretoria onsuksesvol was.
Dit is die tweede keer in die afgelope jaar dat gesprekke om hul voormalige puntemasjien weer deel van die gewese Super-kampioene se arsenaal te maak nie die verwagte resultaat bring nie.
Hougaard, wat aan die herstel is nadat sy haksening twee keer geopereer is, het vroeër vandeesmaand gesprekke met die Bulls se oorhoofse rugbybaas, Heyneke Meyer, en die hoofafrigter, Frans Ludeke, aangevra.
Dit is bekend dat Hougaard, wat nou vir die klub Saracens in Brittanje uitdraf, graag wil terugkom Bulkraal toe, maar onsekerheid oor sy spelpeil ná sy operasies was ’n waarskynlike struikelblok.
“Ons kan ongelukkig nie tans vir Derick in ons struktuur akkommodeer nie. As Derick fiks en beseringsvry is, sal hy steeds ’n speler van wêreldgehalte wees – en as die situasie verander en die omstandighede noodsaak dit, sal ons graag weer op sy en Saracens se knoppie druk,” het Meyer by navraag gesê.
Hougaard self sê hy is bitter teleurgesteld oor die verwikkelinge: “Ek het soveel boodskappe van ondersteuners gekry ná die nuus dat ek dalk kan terugkom, maar wie weet, dalk werk dinge tog nog eendag uit,” het die kookwater-losskakel gesê.
Die Bulls het dalk ’n potensiële tameletjie vermy deur nié vir Hougaard en Morné Steyn te laat meeding om die span se nr.10-trui nie, maar die werklikheid is dat Hougaard se plek nooit werklik gevul is sedert 2008 nie toe hy Meyer na die Leicester Tigers gevolg het.
Die Bulls se tweede losskakels het daarna gekom en gegaan en is nooit kans gegee om hulself te vestig nie. Jacques-Louis Potgieter, Burton Francis en Francois Brummer het die plaasvervangersbank voos gesit en hul spelpeil het daaronder gely. Potgieter het Sharks toe uitgewyk, Francis is Leeus toe en Brummer het groener weivelde gaan soek nadat sy kontrak met die Bulls nié hernieu is nie.
“Ek moet Donderdag ’n keuse maak tussen vier aanbiedinge, twee by Engelse klubs en twee by Franse klubs. Ek dink ’n totale verandering is wat ek nodig het om weer my rugby te geniet,” het Brummer gesê.
Vir die jongste sportnuus volg Nuus24Sport op Twitter.
– Sport24