Liefling vry kliphard na span in Suid-Afrika
2012-01-11 09:01
Kaapstad – Derick Hougaard hoop steeds dit is die Blou Bulle, maar is nog nie seker wie se liefling hy gaan wees wanneer sy kontrak met Saracens in Mei verstryk nie.
“My planne is nog deurmekaar. Ek wil graag terugkeer en in Suid-Afrika rugby speel,” het Hougaard vandeesweek by die bekendstelling van Saracens se Field of Dreams in die Stellenbosse woonbuurt Kayamandi gesê.
Dié voormalige Springbok-losskakel het nog ’n hakseningbesering, maar het saam met Saracens Kaap toe gereis om hul vir Sondag se Heinekenbeker-wedstryd teen Biarritz voor te berei.
Hougaard besef ’n geleentheid by die Bulle is hom dalk nie beskore nie, veral nadat die unie onlangs Lionel Cronjé gekontrakteer het.
“Dis nie ’n geval van die Bulle of niks nie,” sê hy. “Ek het wel sedert my skooldae gedroom dat ek slegs vir een unie sal wil speel.
“Dis belangrik dat my lojaliteit en integriteit nie in twyfel getrek word nie. Daarom wil ek graag by een unie klaarmaak.
“As daar egter elders ’n geleentheid opduik, sal ek dit nie afskiet nie. Ek het voorheen gesê ek sal nooit oorsee gaan nie en nou is ek al byna vier jaar daar.”
’n Fikse Hougaard kan ’n gesogte speler vir die Curriebeker-reeks wees, maar hy kan as gevolg van sy besering in die komende maande vir Saracens speel sonder om die stelskopwerk te behartig.
“Twee van ons skrumskakels is beseer en daar is sprake dat ons beste losskakel en senterpaar vir Engeland gaan speel,” sê hy.
“Ek kan dalk speel sonder om te skop, bloot om ’n gat in die span toe te stop.”
– Sport24
– Bly op hoogte van al die jongste sportnuus deur Nuus24Sport op Twitter te volg
