Leeus se brul is terug
2010-09-03 21:08
Anja Carstens
Kaapstad - Die Goue Leeus het Vrydagaand uithaler-rugby gespeel om die Westelike Provinsie in 'n Curriebeker-kragmeting op Coca Cola-park in Johannesburg met 46-28 te klop.
Die losskakel van die Leeus, Elton Jantjies, het briljant geskop én 'n bonuspunt drie gedruk om 31 van die 46 wenpunte aan te teken.
Die Streeptruie het teen rustyd met 21-19 voorgeloop nadat hulle vir die eerste 40 minute in beheer was van die spel.
In die tweede helfte was dit weer die WP wat eerste punte aangeteken het met die plaasvervanger Conrad Hoffmann wat die besoekers se derde drie gedruk het.
Maar daarna het die wedstryd aan die Leeus behoort. Dit het alles begin met 'n vorentoe skoppie wat pragtig deur vleuel Michael Killian opgetel is om op die doellyn te gaan druk.
'n Paar minute later was dit die sterk agsteman Derick Minnie se beurt om te gaan druk. Die WP het te veel duikslae gemis en hulle het duur betaal aan al die strafskoppe wat afgestaan is.
Jantjies, wat ook die speler van die wedstryd was, het die Leeus se bonuspunt drie in die 67ste minuut gedruk.
Puntemakers:
Leeus: Drieë: Michael Killian (2), Derrick Minnie, Elton Jantjies Doelskoppe: Elton Jantjies (4) Strafskoppe: Elton Jantjies (6)
Westelike Provinsie: Drieë: JJ Engelbrecht, Duane Vermeulen, Conrad Hoffman Doelskoppe: Willem de Waal (2) Strafskoppe: Willem de Waal (3)
Die Leeus se volgende kragmeting is teen die Griekwas in Johannesburg terwyl WP die Luiperds in Kaapstad pak.
Bly op hoogte van al die jongste sportnuus deur Nuus24Sport op Twitter te volg.