Lions reageer op Saru se besluit
2012-08-16 22:59
Johannesburg – Die Goue Leeus Rugbyunie het baie versigtig reageer oor die Lions se weglating uit volgende jaar se Super-rugbyreeks.
Dit is Donderdag ná maande se bespiegeling bevestig dat die Southern Kings in 2013 Suid-Afrika se vyfde Super-rugbyspan gaan wees.
Saru het besluit dat die Lions, wat laaste in die SA konferensie tydens die Super-rugbyreeks geëindig het, nie in 2013 sal deelneem nie.
‘n Promosie/relegasie-wedstryd sal vir deelname in 2014 gehou word.
Die Leeus se president, Kevin de Klerk, het in ‘n baie kort verklaring op die Leeus se webtuiste gesê dat hulle volgende week ‘n mediakonferensie sal hou waartydens hulle hul planne vir die toekoms sal bekend maak, het Rugby365 berig.
Die verklaring het nie bevestig of ontken dat die Leeus daaraan dink om regsaksie teen Saru te neem oor hul deelname nie.
“Ons is verskriklik teleurgesteld in hierdie uitslag,” het de Klerk gesê.
“Dit is ‘n baie swak besluit wat gaan beteken dat ‘n span aan ’n kompetisie gaan deelneem sonder enige rugby-meriete.”
“Ons vat ons tyd om hierdie besluit te oorweeg en sal dan bekend maak hoe ons gaan reageer om ons spelers, personeel, belanghebbendes en ondersteuners te beskerm,” het de Klerk bygevoeg.
– Vir die jongste sportnuus volg Nuus24Sport op Twitter
