Leeus moet hul ‘koppe regkry’
2011-10-07 10:01
Johannesburg – Angstigheid veroorsaak vrees en vrees veroorsaak die soort paniek wat ’n span ’n wedstryd kan laat verloor.
Daarom het die Goue Leeus dit vandeesweek tot elke prys probeer vermy om te fokus op die feit dat hulle Saterdag hier teen die Westelike Provinsie die eerste plek op die Curriebeker-reeks se puntelys kan bespreek.
Uiteraard bly dit belangrik vir die Leeus om eersdaags hul halfeindstryd op Coca-Colapark te speel en om seker te maak die eindstryd is ook hier – as hulle so ver sou vorder.
Tog is dit gevaarlik vir die span om enigsins nou daaroor te lê en droom, want ’n WP-span wat onder druk is om die halfeindronde te haal, kom Saterdag Goudstad toe.
“Natuurlik is ons in beheer van ons eindbestemming, ja,” het John Mitchell, die Leeus se afrigter, gesê. “Maar ons praat nie daaroor (die puntelys) nie en dit (praatjies) is alles persepsies. Angstigheid oor ons posisie veroorsaak vrees. Dis ’n wedstryd tussen twee spanne wat baie hard tot aan die einde gaan veg.” En die Leeus het reeds gewys hulle kán tot die einde veg.
In hul nederlaag van 18-21 teen die Blou Bulle, hul enigste op hul tuisveld in vanjaar se reeks, het hulle byna ’n agterstand van 3-18 uitgewis.
En die afgelope naweek moes die Leeus ’n agterstand van 8-25 uitwis om die louere met die Vrystaat-Cheetahs met 25-25 te deel.
“Ons het goeie karakter gewys om in albei dié wedstryde terug te veg.
“Ons wil natuurlik (in wedstryde) goed begin. Maar dit help nie om oor die verlede te tob nie. Ons moet net ons koppe regkry en weer aan die gang kom,” het Mitchell gesê.
Die Leeus verwag ’n baie fisieke wedstryd teen die WP, die enigste span teen wie hulle nog nie in vanjaar se reeks kon wen nie.
Die WP is erg deur beserings ontwrig. Daar is onder meer ’n gebrek aan ervaring in die middelveld, waar Marcel Brache en Berton Klaasen teen die ervare Alwyn Hollenbach en Doppies la Grange speel.
“Ons verwag beslis nie reën nie,” het Mitchell oor die verskil tussen Saterdag se wedstryd en hul naelbyt-nederlaag van 26-28 in Augustus op Nuweland gesê.
Vir die jongste sportnuus volg Nuus24Sport op Twitter.
– Sport24