Leeus-baas omgekrap oor Allister se sêgoed
2012-08-22 11:20
Kaapstad – Die president van die Goue Leeus-rugbyunie, Kevin De Klerk, is omgekrap oor die breier van die Stormers, Allister Coetzee, se aanmerking dat hy van die Lions-spelers na die Kaap wil lok, het Sport24 Woensdag berig.
Die Westelike Provinsie pak die Goue Leeus Saterdag in 'n Curriebeker-kragmeting op Cocacola-park en spelers soos Elton Jantjies, Pat Cilliers, Franco van der Merwe, Josh Strauss, JC Janse van Rensburg en Jaco Taute kan moontlik in Coetzee se visier wees.
Die breier het vroeër die week erken dat hy dalk sou belangstel om aan een of twee Johannesburgers 'n kontrak te bied.
"Sommige van die ander franchise-spanne sal kyk om te sien of spelers beskikbaar is omdat die Lions nie aanstaande jaar Super-rugby gaan speel nie," het Coetzee gesê.
"Elton Jantjies is 'n speler wat byvoorbeeld 'n uitkom-klousule in sy kontrak het as die Lions nie in die Super-reeks sou speel nie."
Alhoewel de Klerk erken dat een of twee spelers "uitkom-klousules in hul kontrakte het", was hy nie beïndruk met Coetzee se aanmerkings nie.
"Ek hou regtig baie van Allister, maar is absoluut geskok dat hy so 'n opportunistiese uitlating sal maak. Waar is die gees van sport en die respek tussen ons. Wat hier aangaan is nie sport nie."
"Wat met ons (die Lions) gebeur het was nie ons besluit nie."
"Ek wil graag vra dat hulle (die ander unies) net 'n bietjie etiket in die verband sal gebruik," het de Klerk bygevoeg.
Afskoptyd Saterdag tussen die WP en Leeus is om 17:05 in Johannesburg.
Vir die jongste sportnuus volg Nuus24Sport op Twitter.
– Sport24
