Leeus Bok kwyt, een ryker
2010-06-08 08:00
Johannesburg. – Die Leeus se Springbok-stut Heinke van der Merwe het ’n kontrak onderteken om van 1 Julie af twee jaar vir ’n Ierse rugbyklub, Leinster, te speel.
Manie Reyneke, uitvoerende hoof van die Goue Leeus Rugbyunie (GLRU), het gesê hoewel die unie jammer is om ’n speler soos Van der Merwe te verloor, is dit die ideale geleentheid vir hom om sy volle potensiaal te bereik.
Goeie nuus vir die Leeus is dat die afrigter van die Western Force, John Mitchell, en die Springbok-senter van die Sharks Waylon Murray (24) hul kontrakte by die Leeus onderteken het.
“Ek wou nog altyd in die Curriebeker-reeks afgerig het. Ek onderskryf Dick Muir (die Goue Leeus se direkteur van afrigting) se visie en glo in hom,” het Mitchell gesê.
Dié gewese All Black-afrigter sal die Leeus in die Curriebeker-seisoen afrig terwyl Muir sy Bok-verpligtinge as agterlyn-afrigter nakom. “Dit is my doel om die wenkultuur weer by die Leeus te vestig. My eerste plig is om vas te stel waarom hulle nie volgens hul vermoë in die Super14 gespeel het nie,” het Mitchell gesê.
Bly op hoogte van al die jongste sportnuus deur Nuus24Sport op Twitter te volg.
- SAPA