Lawrence erken hy fouteer met dáái wedstryd
2012-01-24 07:00
Auckland. – Die omstrede Nieu-Seelandse rugbyskeidsregter Bryce Lawrence het eindelik, drie maande ná die Wêreldbeker-rugbytoernooi in sy tuisland, uitgepraat oor sy aandeel in Suid-Afrika se kwarteindstryd-nederlaag teen Australië.
Lawrence het destyds behoorlik deurgeloop onder kenners en ondersteuners vir sy rol in die Wallabies se naelskraapse sege oor die Bokke.
Daar was veral ontevredenheid oor sy vertolking van die reëls by die afbreekpunte en dat die Bokke, wat die meeste van die besit gehad het, nie meer strafskoppe in hul guns gekry het nie.
Volgens Lawrence was die herrie wat om sy kop losgebars het “intens”.
“Ek het boodskappe op my Facebook-blad en rekenaar ontvang,” het Lawrence aan allblacks.com gesê.
“Loer oor jou skouer wanneer jy hier kom, want ek gaan jou uithaal. Ek kan nie wag vir jou om hier aan te kom sodat ek op jou kan spoeg nie,” het een van die boodskappe aan die blaser gelui.
“Ek was nie te bekommerd oor mense wat vir my sê hulle kan nie wag totdat ek Suid-Afrika toe kom sodat hulle op my kan spoeg nie. Dit kan op enige plek gebeur.”
Lawrence het gesê die moeilikste deel is die besef dat hy die wedstryd beter kon hanteer het.
“Die kritiek het my nie baie seergemaak nie omdat ek geweet het ek kon baie beter geblaas het.
“Ek het voor die kwarteindstryd ’n plan beraam om tydens die wedstryd nie te tegnies te wees nie, maar dit was moontlik nie die regte plan nie.”
Lawrence het erken die kritiek wat hom die seerste gemaak het, was toe mense hom beskuldig het dat hy met opset so swak geblaas het om die All Blacks te bevoordeel.
“Dit het regtig seergemaak toe die kritiek persoonlik begin raak het. Dis ’n aanval op jou integriteit en alles waarvoor jy staan.
“Ek aanvaar egter die kritiek dat ek beter moes doen. Ek het die wedstryd ontleed en besef dat ek ’n paar dinge gemis het, maar ’n mens kan nie te veel daarin lees nie. Ek het sekere goed net eenvoudig gemis. Dis nie asof ek dit raakgesien en besluit het om niks daaraan te doen nie.”
Volgens Lawrence kan hy nie almal tevrede stel nie.
“Daar is mense wat my voorkeer en sê ek doen goeie werk en moet aanhou daarmee.
“En dan is daar mense wat vir my sê ek is gemors. Vir wie moet ek luister?”
– allblacks.com
– Bly op hoogte van al die jongste sportnuus deur Nuus24Sport op Twitter te volg