Lambie nie WP se enigste kommer

2012-10-23 08:35

Kaapstad – Alhoewel Allister Coetzee erken dat die Haaie se losskakel Patrick Lambie 'n reuse bedreiging inhou, sê hy die WP sal 'n fout maak as hulle slegs op hom in Saterdag se Curriebeker-eindstryd in Durban fokus.

Lambie was twee jaar gelede instrumenteel in die Haaie se oorwinning in die Curriebeker-eindstryd teen die Streeptruie op Kingspark.

Hy het ook 'n sterk vertoning in laas naweek se halfeindstryd teen die Bulle gelewer en het Morné Steyn heeltemal oorskadu.

"Hy is 'n begaafde speler wat onmiddelik toeslaan wanneer daar 'n geleentheid is," het Coetzee Maandag aan Sport24 gesê.

Die WP-breier was egter vinnig om uit te wys dat hulle nie net op een speler in 'n span met hope talent kan fokus nie.

"Ons wil ons opponente eerder as 'n span beskou en seker maak dat ons planne in plek is. Ons kan nie net oor Lambie bekommerd wees nie, want die hele span is sterk en gevaarlik."

"Ons weet ook dat hulle 'n sterk plaasvervangerbank het wat een of twee Springbokke insluit," het Coetzee aan Sapa gesê.

Afskoptyd Saterdag op Kingspark is om 17:00.

Vir die jongste sportnuus volg Nuus24Sport op Twitter.

– Sport24