Krisis wag oor kontrak
2010-01-20 11:14
Johannesburg - Die kontrakdispuut tussen die Lions en die Sharks oor wie die “besitreg” het om Willem Alberts en Louis Ludik te kan kies, stuur op ’n krisis vir die twee begaafde spelers én die twee Super14-spanne af.
Dit kan trouens maande wees alvorens Alberts en Ludik sal kan speel as die geskil nie vinnig besleg word nie.
Die Suid-Afrikaanse Rugbyunie het gister uitsluitsel gegee oor die spelers se posisie deur te sê dat Alberts en Ludik nie vir die Sharks mag speel alvorens hulle nie hul vrystelling-sertifikate van die Goue Leeus Rugbyunie (GLRU) ontvang het nie. Dit geld vriendskaplike wedstryde én die Sanzar-reeks om die Super14-trofee.
Ludik is nog beseer, maar dit ontneem Alberts van sy kans om volgende week sy Sharks-buiging in ’n vriendskaplike wedstryd teen die Western Force in Kaapstad te maak.
Alberts en Ludik het reeds einde verlede jaar by die Sharks begin oefen en die KwaZulu-Natalse span het gehoop die spelers se GLRU-kontrakte kan nietig verklaar word.
Die GLRU betwis die Sharks se bewerings dat die spelers se kontrakte ongeldig is en volhard om te sê Alberts en Ludik is nog Lions-spelers met Lions-verpligtinge.
Verlede jaar het ’n soortgelyke kontrak-dispuut tussen die GLRU en die Westelike Provinsie oor die dienste van Jaque Fourie op arbitrasie uitgeloop, maar ’n beslissing was eers ná maande in ink en Fourie het in dié tyd vir geen unie rugby gespeel nie.
Die Sharks se uitvoerende hoof, Brian van Zyl, wou hom vandeesweek op SA Rugby beroep om die vrystelling-sertifikate by die GLRU te eis, aangesien die Sharks die spelers reeds betaal.
Maar volgens Christo Ferreira, hoof van Saru se regsake, gaan Saru nie tussenbeide tree in die dispuut nie.
“Maar ons regulasies sê wel dat ’n speler nie vir ’n nuwe provinsie in ’n vriendskaplike óf kompetisie-wedstryd mag speel voor hy nie deur die vorige unie vrygestel is nie,” het Ferreira gesê.
- Die 23-jarige Ludik, een van Suid-Afrika se mees opwindende agterspelers, het gister gesê hy het nog “’n week of twee” se rehabilitasie oor voordat hy saam met die Sharks op die veld gaan begin oefen.
Hy het verlede jaar sy knie ernstig in die Lions se wedstryd teen die Britse en Ierse Leeus beseer.
“Ek sal seker oor sowat ’n maand weer kan speel, maar gaan dalk eers Vodacombeker-rugby speel om skerper te word.
“Maar ek is honger om weer te speel,” het Ludik gesê.
-
Beeld
- Beeld