‘Kopskuif beter as kopskerm’
2011-12-21 08:29
Kaapstad. – Daar bestaan geen bewyse dat rugbykopskerms die kans op harsingskudding verminder nie.
Kommer oor die voorkoms en behandeling van harsingskudding was van die hoofbesprekingspunte op die Internasionale rugbyraad (IRR) se mediese beraad in November in Londen.
Intussen het die IRR ’n interaktiewe opvoedkundige webwerf (www.irbplay-erwelfare.com) begin waarop riglyne vir die behandeling van spelers met harsingskudding beskikbaar is.
Behandeling blyk egter nog ’n makliker onderwerp as voorkoming te wees.
Die IRR se hernieude pogings het die kollig gewerp op navorsing wat hy in 2008 befonds het.
Professor Caroline Finch van die Universiteit van Monash in Australië en ’n kenner op die gebied van sportbeserings, was daarby betrokke.
Sy het onlangs op die webwerf www.theconversation.edu.au verwys na daardie navorsing, wat toe onder 4 000 rugbyspelers oor 30 000 speelure gedoen is.
Rofweg ’n derde van die deelnemers het met goedgekeurde kopskerms van die IRR gespeel, ’n derde met aangepaste kopskerms met dikker wande en die res waarmee ook al hulle gewoonlik gespeel het.
“Ons het gevind dat daar absoluut geen afname was in die voorkoms van kopbeserings of harsingskudding onder spelers met kopskerms nie – nie eens onder dié wat met dikker kopskerms speel nie,” het Finch onlangs gesê.
Uitwendige skete soos snye en blomkoolore kan wel só verminder word.
Finch het bygevoeg dat sommige spelers veiliger voel met kopskerms aan en dat dit ’n geldige rede is om dit aan te skaf.
Maar omdat daar volgens die navorsing tans geen bewyse is dat dit harsingskudding voorkom nie, moet spelers nie verplig word om daarmee te speel nie.
Volgens haar moet rugbyreëls op skolevlak liefs aangepas word sodat die nodige vaardighede met minder kontak ontwikkel kan word totdat die spelers kognitief en fisiek opgewasse is vir die stampe en stote van ’n rowwe sport soos rugby.
Berrick Barnes, ’n agterspeler van die Wallabies, se loopbaan is vroeër vanjaar so byna weens herhaalde harsingskudding kortgeknip. Hy het al ’n beroep op die IRR gedoen om dikker kopskerms toe te laat.
’n Kopskuif in hoe rugby op skolevlak aangebied word, is egter volgens Finch die beste en ’n volhoubare manier om toekomstige Barnes-gevalle te voorkom.
Vir die jongste sportnuus volg Nuus24Sport op Twitter.
– Sport24