Kommer oor 'krisis in Bulle se rugby'
2011-09-06 09:07
Pretoria – “Die Blou Bulle is besig om roekeloos met hul wenkultuur te werk.”
Dít was een van die menings wat ’n oud-Bul-rugbyspeler Maandag aan Sport24 gegee het toe hy oor die span se swak Curriebeker-veldtog tot nou gevra is.
Die voormalige spelers sê hoewel hulle die Bulle diep in die hart dra, glo hulle dat dié span ondanks die afwesigheid van sy voorste Springbokke beter spel aan ondersteuners verskuldig is.
“Ek weet nie. Dit lyk of hulle besig is om daardie wenkultuur te verloor en glo my, dit is nie iets wat jy weer maklik terugkry nie,” het Krynauw Otto gesê.
“Heyneke (Meyer) het destyds lank gewerk om dit weer gevestig te kry.”
Die Bulle is ná agt van hul veertien ligawedstryde in die Curriebeker-reeks in die sesde plek en hul volgende drie teenstanders is die Vrystaat-Cheetahs, die Westelike Provinsie en die Leeus. Nog ’n nederlaag kan fataal wees.
Otto noem dit ’n “krisistyd” in Bulle-rugby en vergelyk die huidige situasie met die een in 1993 toe verskeie ervare spelers, onder wie Uli Schmidt, vir ander unies gaan speel het.
“Dit is goed om jongelinge kanse te gee en van die outjies soos Louis Fouché (losskakel) gryp hul kanse aan. Maar jy moes die outjies een vir een laat deurkom het,” het hy gesê.
“Die Leeus het die laaste jare gewys dat dit goed en wel is om ’n klomp jong outjies vol bravade in te gooi, maar dit is nie ’n wenresep nie tensy jy ’n fantastiese afrigter het.”
Otto wonder ook hoe die oudbreiers Frans Ludeke en Meyer tans betrokke is.
Die Blou Bulle Rugbyunie het sy afrigtingstrukture voor 2011 se Curriebeker-reeks verander deur Ludeke uitsluitlik as die Bulls se Super Rugby-afrigter te behou en hy is ook hoof van die BBRU se beroepsrugby-afdeling.
Meyer is as rugbyhoof aangestel.
“Pine (Pienaar, Blou Bul-afrigter) het ’n baie moeilike werk geërf. Heyneke kon maklik nog vir ’n jaar of twee die span afgerig het sodat jy Pine stadig kon inbring,” het Otto gesê.
“Nou het jy buiten nuwe spelers ook ’n nuwe afrigter. En as daar boonop steeds ’n paar ervare spelers in die span is, is dit juis moeilik vir ’n jong onervare afrigter om sy stempel heeltemal af te druk.”
Pienaar, wat die Vrystaat se jong spanne met sukses afgerig het, was ook die hulpafrigter van die SA o.20-span voordat hy by die Bulle betrek is.
Deon Oosthuyzen, ’n voormalige Bul-vleuel, het gesê dit is moeilik om die nuwe Bul-breier te kritiseer en verskeie kenners glo die 32-jarige Pienaar is deur die BBRU vir die wolwe gegooi.
“Wat moes hy (Pienaar) doen noudat al die ou spelers weg is? Nou bring hulle ’n onervare ou in. Vir my is die knelpunt juis dat hulle ’n ervare afrigter moes aanstel omdat die span nou onervare is,” het Oosthuyzen gesê.
“Dit sou nog maklik gewees het as jy skielik van Bakkies (Botha) en Victor (Matfield) se ervaring kon tap.
“Ek dink as hulle nog een wedstryd verloor, moet hulle maar die jong spelers verder inspan. Jy kan hulle nie eers in die Super Rugby-reeks wil hard maak nie.”
Vir die jongste sportnuus volg Nuus24Sport op Twitter.
– Sport24