Koen, De Villiers sluit aan by Bokke
2012-05-24 23:00
Kaapstad – Twee voormalige toetsspelers, Louis Koen en Pieter de Villiers, is bygevoeg tot die Springbok-bestuurspan as konsultante vir die opkomende internasionale seisoen.
Die aanwysings is Donderdag deur die Uitvoerende Raad van die Suid-Afrikaanse Rugbyunie (Saru) goedgekeur by ‘n vergadering in Kaapstad.
Die voormalige losskakel Koen, wat die Springbokke in 15 toetse tussen 2000 en 2003 verteenwoordig het, is as skopkonsultant aangewys.
De Villiers, wat in Suid-Afrika gebore is, het in 70 toetse vir Frankryk gespeel van 1999 to 2007. Hy is aangewys as die Springbokke se skrumkonsultant.
Die Springbok-afrigter, Heyneke Meyer, het gesê hy is verheug om Koen en De Villiers tot die bestuurspan te verwelkom.
“Hulle bring ‘n rykdom aan kennis in hul spesialis-areas van skop en skrumwerk, maar hulle ken en verstaan ook die uitdagings van toetsrugby, aangesien hulle op die hoogste vlak gespeel het,” het Meyer gesê.
“Tesame was hulle betrokke by verskeie wêreldbeker-rugbytoernooie en hierdie soort ervaring is iets wat altyd waardevol in toetsrugby is.”
Koen en De Villiers sal Sondag by die Springbokke aansluit by hul beplanningskamp in Durban.
- Volg Nuus24Sport op Twitter
